"DogruXeber.tv" xəbər verir ki, Ağdam şəhəri Maqsudlu kənd ərazi icra nümayəndəsi Abbasov Rasim Qurban oğlunun keçmişi və dövlət qulluğuna təyinatı ilə bağlı cəmiyyətdə ciddi və cavabsız suallar yaranıb. Burada söhbət təkcə bir məmurun bioqrafiyasından deyil, Azərbaycan dövlət idarəçiliyində hüquqi uyğunluq, siyasi məsuliyyət və ictimai etimad prinsiplərinin real vəziyyətindən gedir.
Məlumata görə, Rasim Abbasov məhkumluq həyatı yaşayıb və buna baxmayaraq, özünün də bildirdiyi kimi, 10 ildən artıqdır dövlət qulluğunda çalışır. Bu fakt artıq təkcə etik deyil, birbaşa hüquqi müzakirə predmeti olmalıdır. Çünki “Dövlət qulluğu haqqında” Azərbaycan Respublikasının Qanunu açıq şəkildə göstərir ki, müəyyən kateqoriyalı cinayətlərə görə məhkum olunmuş şəxslərin dövlət qulluğuna qəbulu yolverilməzdir.

Bu nöqtədə cəmiyyətin haqlı sualları ortaya çıxır:

– Rasim Abbasov hansı hüquqi mexanizm və istisna əsasında dövlət qulluğuna qəbul edilib?
– Onun məhkumluğu hansı cinayət tərkibi üzrə olub və bu fakt kadr yoxlaması zamanı necə “görünməz” edilib?
– Dövlət qulluğuna qəbul zamanı qanunun tələbləri doğrudanmı tətbiq olunub, yoxsa formal şəkildə kənara qoyulub?
Bu suallar cavabsız qaldıqca məsələ artıq bir şəxsin deyil, idarəçilik sisteminin problemi kimi qiymətləndirilməlidir.

"DogruXeber.tv" xəbər verir ki, Maqsudlu kənd sakinlərinin verdiyi məlumata əsasən, Rasim Abbasovun uzun illərdir vəzifədə qalmasının əsas səbəbi Ağdam Rayon İcra Hakimiyyətinin başçısı Vaqif Həsənovun birbaşa himayəsi ilə izah olunur. Sakinlərin iddiasına görə, məhz bu himayə onu həm inzibati nəzarətdən, həm də ictimai hesabatlılıqdan kənarda saxlayıb.

Əgər bu iddialar həqiqətə uyğundursa, artıq məsuliyyət təkcə kənd ərazi nümayəndəsinin deyil, rayon icra başçısının siyasi və inzibati məsuliyyəti məsələsinə çevrilir. Çünki icra başçısı qanunvericiliyin tələblərini kənara qoyaraq problemli keçmişə malik kadrı qoruyursa, bu, açıq şəkildə vəzifədən sui-istifadə və patronaj idarəçiliyi deməkdir.

Elmi-siyasi baxımdan bu hal patron–klient münasibətləri modelinin klassik nümunəsidir. Yəni hüquq, şəffaflıq və peşəkarlıq yox, şəxsi sədaqət və qeyri-rəsmi münasibətlər əsas meyar kimi çıxış edir. Bu isə: Dövlət institutlarının zəifləməsinə, Sosial ədalətsizliyə, Vətəndaşların dövlətə olan inamının sarsılmasına gətirib çıxarır.

Burada tez-tez səsləndirilən bir arqument də var: “Şəxs cəzasını çəkibsə, cəmiyyətə qayıtmaq hüququ var.” Bu, doğrudur. Lakin dövlət qulluğu adi əmək fəaliyyəti deyil. Dövlət qulluğu etibar, nüfuz və hüquqi qüsursuzluq tələb edən xüsusi statusdur. Reabilitasiya anlayışı ilə dövlət adından qərarvermə səlahiyyəti eyni müstəvidə qiymətləndirilə bilməz.

Bu gün cəmiyyət açıq cavab gözləyir:

– Rasim Abbasovun təyinatı hansı rəsmi prosedurlar əsasında aparılıb?
– Onun şəxsi işi və keçmiş məhkumluğu aidiyyəti qurumlar tərəfindən obyektiv araşdırılıbmı?
– Ağdam icra başçısı Vaqif Həsənov bu məsələ ilə bağlı ictimaiyyətə açıqlama verməyə hazırdırmı?

Bu suallar cavabsız qaldıqca problem lokal xarakter daşımır, dövlət idarəçiliyinin legitimliyi və hüquqi bərabərlik prinsipi sual altına düşür. Qanun həqiqətən hamı üçündürsə, o zaman vəzifə sahibləri üçün də eyni dərəcədə keçərli olmalıdır.
Məsələ ilə bağlı adı çəkilən Maqsudlu kənd ərazi icra nümayəndəsi Rasim Abbasovla redaksiya tərəfindən telefon əlaqəsi saxlanılıb və onun məhkumluğu ilə bağlı suallar ünvanlanıb. Rasim Abbasov uzun danışmağa önəm verməyərək qısa şəkildə bildirib ki, “kimin nəinə lazımdır ki, mən necə işləyirəm”. O, eyni zamanda qeyd edib ki, “16 ildən çoxdur bu vəzifədəyəm” və “aidiyyəti qurumlardan təmizlik kağızı alıb təqdim etmişəm”. Şəxs əlavə açıqlama vermədən söhbəti yekunlaşdırıb.

"DogruXeber.tv"