Azərbaycanın dini idarəçilik sistemində son illərin ən diqqətçəkən dəyişikliklərindən biri məscidlərə axundların təyinatı ilə bağlı səlahiyyətli qurumun dəyişdirilməsidir. Uzun müddət bu proses Qafqaz Müsəlmanları İdarəsinin (QMİ) nəzarətində idi və dini liderlərin təyin olunması məhz bu qurumun daxili mexanizmləri əsasında həyata keçirilirdi. Lakin sonradan səlahiyyətin QMİ-dən alınaraq Dini Qurumlarla İş üzrə Dövlət Komitəsinə verilməsi dini idarəetmədə yeni mərhələnin başlanğıcı kimi qiymətləndirildi.
Bu dəyişiklik dövlət-dini icma münasibətlərinin yenidən tənzimlənməsi, məsuliyyət bölgüsünün və nəzarət mexanizmlərinin yenilənməsi mənasına da gəlir.

Modern.az-a müsahibə verən Qafqaz Müsəlmanları İdarəsinin sədri, Bütün Qafqazın Şeyxi Allahşükür Paşazadənin qardaşı, deputat Cavanşir Paşazadə bu məsələyə də münasibətini bildirib.

O qeyd edib ki, axundların təyinatının Qafqaz Müsəlmanları İdaərsindən alınmasından sonra bu sahədə heç bir fərq görməyib.

“Hər hansı bir fərq görmürəm. Səlahiyyətlərin alınması deyəndə ki, o ciddi bir şey ifadə etmir. Elmi tərəfini Qafqaz Müsəlmanları İdarəsi yoxlayır, əmrini isə Dini Komitə verir. Biz gərək şəriətin işinə qarışmayaq. Azərbaycanda din dövlətdən ayrıdır. Biz isə bu məsələdə sanki dinin işinə qarışmışıq”.

Cavanşir Paşazadə bu məsələdə Şeyxin ona heç bir narazılığının olmadığını da qeyd edib:

“Biz Şeyxlə belə məsələləri müzakirə etmirik. Siz ola bilər ki, onu yaxından tanımırsınız”.

Həccə getmək məsələsinə hələ də Qafqaz Müsəlmanları İdarəsinin nəzarətindən danışan Cavanşir Paşazadə vurğulayıb ki, Qafqaz Müsəlmanları İdarəsinin razılığı ilə kvota verilir. Hər dövlətdə bu, belə tənzimlənir. Bizdə kvota çox azdır – 500-600 nəfər üçün yer ayrılır.

Ailədə Şeyxin yolunu davam etdirə biləcək biri yoxdur:

“Bizim ailəmizdə əzəldən dinə bağlılıq olub. Amma nəslimizdə tam dindar adam olmayıb. Şeyxin ailəsi Quran oxuyur, qızları namaz qılır. Amma ailədə Şeyxin yolunu davam etdirə biləcək biri yoxdur”.