Abşeron gənclər şəhərciyində yaşayan Quliyeva Səidə Abbasqulu qızı dələduzluqla üzləşib. O, bu barədə tədbir görülməsi üçün daxili işlər naziri Vilayət Eyvazova və Abşeron rayon Polis İdarəsinə müraciət edib.

Redaksiyamıza da təqdim olunan şikayətdə bildirilir ki, dörd övlad anası olan Quliyeva Səidənin həyat yoldaşı hərbçi olub və vəzifə başında vəfat edib. Onun bu vəziyyətindən sui-istifadə edən, Binəqədi rayon Rəsulzadə qəsəbəsində yaşayan Nəbiyev Əli Elxan oğlu külli miqdarda vəsaitini mənimsəyərək ona qarşı dələduzluq edib.

Müraciətdə bildirilir ki, Nəbiyev Əli Elxan oğlu iş başında vəfat etməsini əsas gətirərək onun həyat yoldaşına şəhid statusu verdirəcəyini deyib və bu məqsədlə beş min AZN alıb: “Ağlıma da gəlməzdi ki, mənə qarşı fırıldaqçılıq, belə dələduzluq edər, çünki danışıq tərzi, özünü təqdim etməsi tamamilə çaşdırıcı idi. Amma pulu almasından iki ildən də artıq vaxt keçsə də, verdiyi vədi yerinə yetirə bilmədi və mən ondan verdiyim pulu geri istədim. Bu zaman mənə qarşı hədə-qorxular başladı, fərqli adamlar vasitəsilə mənə zəng etdirir, özümü, övladlarımı hədələyirdi. Mən qızıllarımı lombarda qoyara q 2500 AZN kredit götürmüşdüm, ora da faiz ödəməli idim. Hətta günahı mənim üzərimə atmağa cəhd etdi, bəzən isə guya mərmi yarası aldığını, Qarabağ zonasında olduğunu söyləyərək yalanlarını davam etdirdi.
Aldanıldığımı başa düşəndən sonra dolayı yollarla ünvanını tapdım, anası ilə görüşdüm. Anası sakit şəkildə dedi ki, oğlu məndən aldığı puldan ailəsinə xərcləməyib, guya oğlunun ailəsini də o saxlayır. Əvvəl dedi ki, bankdan kredit götürüb mənim borcumu ödəyəcək. Bir il müddətində də anasının verdiyi sözü yerinə yetirməsini gözlədim. Amma anası da borcumu qaytarmadı. Sonra da dedi ki, bankda “qara siyahı”dadır, o siyahıdan çıxdıqdan sonra borcumu qaytaracaq. Amma illərdir ki, pulumu geri ala bilmirəm. Belə başa düşürəm ki, anası da oğlunun əməllərindən xəbərdardır və onun bu əməllərini ört-basdır edir, mənim kimi digər şəxsləri də aldadaraq pul alması istisna deyil”.


Şikayətçi bildirib ki, verdiyi pulu geri istəyəndə ona hədə-qorxu gəlinməklə yanaşı, qarşı tərəf pulun verilməsinə dair bütün sübutları, yazışmaları da silməyə cəhd edib: “Bütün votsap yazışmalarımızı ikitərfli silib, amma mən yazışmaları “skrin” etmişəm, bütün sübutları təqdim etməyə hazıram”.
4 uşağını tək böyüdən və olduqca çətin maddi vəziyyətdə olduğunu deyən şikayətçi daxili işlər naziri Vilayət Eyvazovdan dələduzluqla məşğul olan şəxsə qarşı tədbir görülməsini xahiş edib:


“Cənab nazir, mən Sizə mərhum hərbçi xanımı, 4 uşaq anası kimi müraciət edirəm və yardım istəyirəm. Nəbiyev Əli Elxan oğlunun məndən fırıldaqçılıq yolu ilə aldığı pulun geri ödənilməsi, onun qanun qarşısında cavab verməsi üçün göstəriş verməyinizi xahiş edirəm. Mənim güvən yerim ancaq dövlətimizin ədalətinədir”.