İnsan doğulduğu gündən işığa doğru can atır, daim ucalmaq, xalqına, millətinə və dövlətinə fayda vermək arzusu ilə yaşayır. Tarix səhnəsinə nəzər yetirib, yaddaqalan şəxsiyyətləri göz önünə gətirsək şübhəsiz ki, xalqımızın Ümummilli lideri Heydər Əliyev yada düşər. Heydər Əliyev uşaqlıqdan memar olmağı arzulayırdı. İstəyərdi ki, yaratdığı abidələrin bünövrəsi güclü, daima yaşar olsun. Düzdür, Heydər Əliyev abidələrin memarı ola, bilmədi, ancaq qüdrətli, müstəqil, bütöv Azərbaycanın memarı oldu. Bünövrəsi güclü olan dövlət daha uzunömürlü və qüdrətli olur. Eynilə Azərbaycan kimi. Bünövrəsi güclü olan bir dövləti yaratmağı isə yalnız uzaqgörən, istedadlı bir lider bacara bilərdi. Bəli, o şəxsiyyət Heydər Əliyev idi.

Qazaxıstan yazıçısı, səfir Oljas Süleymanov haqlı olaraq Heydər Əliyevə demişdir: "Çox vacibdir ki, müstəqilliyin təşəkkül tapdığı məhz bu çətin dövrdə xalqlara Sizin kimi yüksək dərəcəli peşəkarlar, bərkdən-boşdan çıxmış insanlar rəhbərlik etsinlər. Çünki belə imkan xalqlara min ildə bəlkə də bir dəfə verilir və onu əldən buraxmaq olmaz. Heydər Əliyev, Sizin kimi rəhbərlərin xidməti məhz bundan ibarətdir." Tarixən hər bir müstəqil dövlətin yaranmasını, inkişafını, möhkəmlənməsini ve davamlı olmasını digər tarixi-siyasi səbəblərlə yanaşı, xalqı bu dövlətin ətrafında birləşdirəcək güclü liderin olması da şərtləndirir. Böyük dövlətçilik təcrübəsi və istedadına malik Ümummilli lider Heydər Əliyev bilirdi ki, gənc, təcrübəsiz və müharibə aparan müstəqil Azərbaycanı bir dövlət kimi qurmaq, ayağa qaldırmaq, yaşatmaq, möhkəmləndirmək və qüdrətləndirmək üçün bütün vətəndaşların ümumi bir məqsəd ətrafında birləşməsi gərəkdir. Artıq özünü bir millət kimi dərk etmiş, azadlığını və müstəqilliyini qazanmış xalqı yalnız milli ideya birləşdirə bilər. Bu milli ideyanın yaranması və inkişafında Ümummilli lider Heydər Əliyevin və onun siyasi irsinin davamçısı Prezident İlham Əliyevin müstəsna xidməti hər birimizə məlumdur. Heydər Əliyev nəinki Azərbaycanda, həm da dünyanın müxtəlif yerində yaşayan azərbaycanlıları bir ideya altında müstəqil Azərbaycan dövlətinin qüdrətlənməsi və inkişafına xidmət etmək ətrafında birləşdirə bildi. Bu da tasadüf deyilki bu gün dünyanın hər yerində yaşayan milyonlarla azərbaycanlı hər bir şəraitdə öz dövlətinə inamla dəstək olur. Güclü dövlət güclü ordudan başlayır. Ümummilli liderimiz də bu istiqamətə xüsusi diqqət yetirirdi. Qurulduğu gündən Azərbaycan Respublikası Silahlı Qüvvələrinin mövcudluğu və şərəfli tarixi dahi şəxsiyyətin adı ilə bağlıdır. Güclü, müştərək və raşadətli Azərbaycan ordusunun formalaşması Heydər Əliyevin dövlətçilik təfəkkürünün, siyasi uzaqgörənliyinin və təşkilatçılıq qabiliyyətinin məntiqi nəticəsidir. Azərbaycan tarixi ənənələrinin davam etdirilməsi, gənclərin qəhrəmanlıq yolunda formalaşması, sərkərdələrin və görkəmli hərb xadimlərinin şərəfli yolunun yaşadılması Heydər Əliyevin hər zaman diqqət mərkəzində olub, Onun fikirləri qarşısında ona heyran olmamaq, azərbaycanlı olmaqla qürur duymamaq mümkün deyil. Ulu öndər hər bir azərbaycanlının uğuruna, zəhmətinə görə böyük sevinc hissi duyurdu....

Vüsal Hümbətzadə
Pakistanın Azərbaycandakı fövqəladə və səlahiyyətli səfirinin köməkçisi