Balakən rayon Hənifə kənd sakinləri BakuNews.az-a etdiyi müraciət əsasında Balakən rayon İcra Hakimiyyətinə verilən sorğumuza cavab olaraq məlumat verilib. Həmin Məlumatı olduğu kimi oxuculara təqdim edirik.

BakuNews.az redaksiyasına

Balakən Rayon İcra Hakimiyyətinə ünvanladığınız sorğuya cavab olaraq bildiririk ki, rayonunun Hənifə kəndində yerləşən, üç şəhid ailəsinin yaşadığı ərazinin də daxil olduğu Balakən-Hənifə-Tülü-Talalar avtomobil yolunun əsaslı təmiri dövlət investisiya vəsaiti hesabına nəzərdə tutulmuşdur. Eyni zamanda sözügedən yolun təmiri ilə əlaqədar kənd sakinləri Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədovun 30 iyun 2025-ci il tarixdə Balakən rayonunda keçirdiyi qəbulda iştirak etmişlər.

Həmin yol 15 nömrəli Yol İstismarı MMC-nin balansındadır. Mütəmadi olaraq həmin yolda 15 nömrəli Yol İstismarı MMC tərəfindən hamarlama işləri aparılmış, hava şəraiti yaxşılaşdıqdan sonra yenidən cari təmir işləri həyata keçiriləcəkdir. Həmçinin qeyd edilən yolun 2026-cı ildə Azərbaycan Avtomobil Yolları Dövlət Agentliyi tərəfindən asfaltlanması nəzərdə tutulmuşdur.

Qeyd edək ki, 9 min əhalinin yaşadığı 7 yaşayış məntəqəsini əhatə edən 25 km uzunluğunda Balakən-Hənifə-Gülüzanbinə və ona bitişik avtomobil yolları əhalinin müraciətləri və yolların mövcud vəziyyəti nəzərə alınaraq 2018-ci ildə asfaltlanmışdır.

Balakən Rayon İcra Hakimiyyəti Başçısının müavini-Sosial-iqtisadi
və memarlıq-tikinti məsələləri şöbəsinin müdiri: Turan Dibirov