Bakunews.az-a Zaqatala Qaz İstismar İdarəsinin əməkdaşları və abonentləri tərəfindən daxil olan müraciətlərdə idarənin rəisi Azər Musayevin fəaliyyəti ilə bağlı ciddi iddialar səsləndirilir. Anonim qalmasını istəyən idarə əməkdaşı bildirir ki, Azər Musayev rəhbərlik etdiyi müddətdə iclaslarda qeyri-etik ifadələr işlədir, işə aid olmayan mövzularda danışır, əməkdaşları açıq şəkildə təhqir edir və onları psixoloji təzyiq altında saxlayır. Onun sözlərinə görə, idarədə qorxu mühiti formalaşıb və işçilər işlərini itirməmək üçün susmağa məcbur qalırlar.

Müraciətdə qeyd olunur ki, Azər Musayev daha əvvəl Salyan regionunda və Balakən rayonunda da rəhbər vəzifələrdə çalışıb, lakin işçilərlə davranışına görə həmin ərazilərdən uzaqlaşdırılıb. İddia edilir ki, Zaqatalada da eyni idarəçilik üslubu davam etdirilir və şikayət edən əməkdaşlar əsassız töhmətlərə, saxta ittihamlara və işdən çıxarılma hədələrinə məruz qalırlar.

Əməkdaşın bildirdiyinə görə, hazırda qanunsuz qaz xətlərinin yeri dəyişdirilir, sayğaclar qəsdən passiv vəziyyətə salınaraq sonradan 1500–2000 manat qarşılığında pay torpaqlarında tikilmiş evlərə satılır. Qanunla mümkün olmadığı halda ölü adına olan qaz xətləri saxlanılır, ad dəyişikliyi üçün vətəndaşlardan 150–200 manat tələb edilir. Yeni qaz çəkilən evlərdə isə podratçı üzərindən 50 manat ödəniş verilmədikdə qazın qoşulmasına icazə verilmir. Bayram və istirahət günlərində işçilərin əlavə ödəniş olmadan işə cəlb edildiyi, etiraz edənlərə isə “istəmirsənsə, ərizəni yaz” deyildiyi də iddialar sırasındadır.

Müraciətdə həmçinin bildirilir ki, rəhbərlik işçiləri məqsədli şəkildə vətəndaşlarla qarşıdurmaya sövq edir, qazın kəsilməsi zamanı qəsdən gərginlik yaradılmasını tapşırır, yaranan insidentlərdə isə məsuliyyət sıravi əməkdaşların üzərinə atılır. İddialara görə, şəhid ailələri ilə bağlı səsləndirilən “dövlət pul verir, ondan ödəsin” kimi ifadələr də ciddi narazılıq doğurur.

Şikayətdə vurğulanır ki, idarə rəhbərinin aylıq 13 500 manat maaş və 3 500 manat bonus əldə etməsi fonunda, maaşı 500–600 manat civarında olan sıravi əməkdaşlara təzyiq göstərilir və onların qanunsuz göstərişləri yerinə yetirməyə məcbur edildiyi iddia olunur. Bildirilir ki, artıq bu cür vəziyyətə dözə bilməyən bəzi işçilər könüllü şəkildə işdən ayrılmağa məcbur qalıb.



Şikayətlər təkcə idarə əməkdaşları ilə məhdudlaşmır. Zaqatala rayon Əliabad kənd sakini, abonent Məmmədova Nailə Heydər qızı bildirir ki, heç bir əsaslı səbəb göstərilmədən onun qaz təchizatı üç ay müddətinə dayandırılıb. Yalnız baş idarəyə müraciət etdikdən və oradan qazın bərpası ilə bağlı rəsmi cavab aldıqdan sonra qaz verilişi təmin edilib. Abonent iddia edir ki, bir müddət sonra yenidən qaz təchizatı dayandırılıb və bu dəfə səbəb kimi “hörmət etməməsi” və birbaşa baş idarəyə şikayət etməsi göstərilib. Onun sözlərinə görə, bu hal açıq-aşkar təzyiq və cəza xarakteri daşıyır və vətəndaşın qanuni şikayət hüququnun pozulmasıdır.

Şikayətçilər aidiyyəti qurumları səsləndirilən iddiaları araşdırmağa və məsələyə hüquqi qiymət verməyə çağırırlar.

Qeyd edək ki, yazıda yer alan iddialar müraciət edən şəxslərin bildirdikləridir. Şikayətçilərin sayının çox olması səbəbindən digər müraciətlər növbəti yazılarda dərc ediləcək. Qarşı tərəfin mövqeyini dərc etməyə hazırıq.

Azəriqaz İB tərəfindən açıqlama verilib, N.H.Məmmədova Zaqatala rayonu Əliabad qəsəbəsində mərhum Süleymanov Rəsul Süleyman oğlunun adına olan qaz hesabının (254706500207040) kürəkəni Turan Məmmədovun adına rəsmiləşdirilməsi üçün müraciət etmişdir. Bununla bağlı yerində keçirilən baxış zamanı Rəsul Süleymanova məxsus tikilidə yaşayış olmadığı, onun adına olan Zenner G4T markalı 21110490637 saylı sayğacın birləşdirildiyi qaz xəttindən həmin həyətyanı sahədə yerləşən və dəmir hasarla ayrılmış yeni inşa edilmiş Turan Məmmədova məxsus fərdi yaşayış evinə özbaşına qaz xətti çəkilərək qazdan istifadə edildiyi müəyyən olunmuşdur. Bu səbəbdən qaz xətti qazpaylayıcı şəbəkəyə qoşulma yerində qaynaqla kəsilmişdir. Eyni zamanda Məmmədova Nailə Heydər qızına yeni tikilmiş fərdi yaşayış evinin qazpaylayıcı şəbəkəyə qoşulması üçün “Tikinti obyektlərinin qazpaylayıcı şəbəkəyə qoşulması və ya əlavə qaz həcmi alması Qaydası”na uyğun olaraq, həmçinin qaz hesabının vəfat edən şəxsin adından vərəsəlik hüququ olan şəxsin adına keçirilməsi və yeni qazın alqı-satqı müqaviləsinin bağlanılması üçün “ASAN xidmət” mərkəzinə müraciət etməsi izah olunmuşdur. Bundan sonra müraciət əsasında mərhum R.S.Süleymanova məxsus evin (yaşayış olmayan köhnə ev) 254706500207040 saylı qaz hesabı Səfərova Gülbahar İskəndər qızının adına rəsmiləşdirilmişdir. Lakin N.H.Məmmədovun şikayətində göstərilən yeni fərdi yaşayış evinin qazlaşdırılması ilə bağlı “ASAN xidmət” mərkəzinə müraciət edilməmiş, əksinə hazırda G.İ.Səfərovaya məxsus olan sayğac vasitəsilə təkrar yeni fərdi yaşayış evinin şəbəkəyə qoşulduğu müəyyən edilmişdir. N.H.Məmmədovanın adına həmin ünvanda fərdi yaşayış evi və qaz hesabı mövcud deyildir və sözügedən evin qaz təminatının qanunsuz olaraq dayandırılması, onun yenidən bərpası ilə bağlı qeyd olunanlar isə tamamilə əsassızdır.