Göyçay rayonunun Qarabaqqal kənd sakinləri ciddi narahatlıq keçirir. Sakinlər bildirir ki, evlərin cəmi 10 metrliyində yerləşdirilən küçə itləri üçün sığınacaq kəndin sanitar vəziyyətini ağırlaşdırıb, əhalinin psixoloji və fiziki təhlükəsizliyini risk altına salıb.

Şikayətçi Qəfərli Taleh Mübariz oğlu bildirir ki, 20 gündən artıqdır evlərinin qarşısında salınan bu sığınacağa yüzlərlə küçə iti toplanıb. Gecə-gündüz davam edən hürmə səsləri uşaqların psixologiyasına mənfi təsir göstərir, heyvanlara hücum halları qeydə alınıb, qoxu və xəstəliklər yayılmağa başlayıb:

“Quzularımızı parçalayıblar, hətta kənardan gətirilmiş ölü iribuynuzlu heyvan leşlərini itlərin qabağına atırlar. Bu görüntünü görənlər dəhşətə gəlir. Əvvəllər it sığınacağı yaşayış məntəqəsindən uzaqda idi, indi isə düz evlərin arasına köçürülüb.”

Sakinlər məsələ ilə bağlı Göyçay Rayon İcra Hakimiyyətinə müraciət etsələr də, şikayətlərinin cavabsız qaldığını bildirirlər. İcra başçısının müavini Kərim Seyidovun onlara sığınacağın olduğu yerdə qalacağını dediyi qeyd olunub.

Qanunvericiliyə görə, belə sığınacaqlar yaşayış ərazilərindən uzaqda, sanitar və ekoloji normalara uyğun təşkil olunmalıdır. “Heyvanlar aləmi haqqında” Qanunun 5-ci maddəsində də bu tələb öz əksini tapır.

Taleh Qəfərli vasitəsilə kənd sakinləri Azərbaycan Respublikasının Prezidenti cənab İlham Əliyevə, Birinci vitse-prezident Mehriban Əliyevaya, Ekologiya və Təbii Sərvətlər Nazirliyinə, Gigiyena və Epidemiologiya Mərkəzinə və digər aidiyyəti qurumlara müraciət edərək küçə itləri üçün sığınacağın kənddən uzaq bir əraziyə köçürülməsini tələb edirlər.

Bakunews.az məsələ ilə bağlı qarşı tərəfin Göyçay Rayon İcra Hakimiyyətinin də mövqeyini işıqlandırmağa hazırdır.



Göyçay Rayon İcra Hakimiyyəti məsələ ilə bağlı açıqlamasında bildirir ki, Sahibsiz itlərin sayının artmasının qarşısını almaq və onlara humanist yanaşmaq məqsədilə rayonun Qarabaqqal kəndində istifadə olunmayan keçmiş ferma ərazisində bələdiyyə tərəfindən cari təmir işləri aparılmış, ərazi hasarlanaraq itlərin saxlanması üçün şərait yaradılmışdır.
Sahibsiz itlərin burada birkalanaraq peyvənd olunması, quduzluğa qarşı vaksinasiya edildikdən sonra azad buraxılması işləri aparılır. Həmin ərazidə saxlanılan sahibsiz itlərin ərazidəki digər heyvanlara və mal-qaraya ziyan vurması faktı barədə məlumat təsdiqini tapmamışdır.
Əlavə olaraq Göyçay bələdiyyəsi tərəfindən “İDEA” Heyvanlara Qayğı Mərkəzi İctimai Birliyi ilə müqavilə bağlayaraq sahibsiz itlərin Bakı şəhərində sığınacağa yerləşdirilməsi işləri də davam etdirilir.
Video paylaşım sahibsiz itlər üçün yaradılmış sığınacağı qanunsuz şəkildə zəbt edərək ondan istifadə etmək istəyən şəxslər tərəfindən təşkil olunub.