Ucar rayonu Lək kənd sakini Süleymanov Məhbus Ağamirzə oğlu tərəfindən Bakunews.az-a daxil olan şikayət Dövlət Məşğulluq Agentliyinin özünüməşğulluq proqramında baş verən saxtakarlıq və məsuliyyətsizlik iddialarını ortaya çıxarır.

Şikayətçi bildirir ki, 09 iyul 2025-ci il tarixində kənd təsərrüfatı üzrə özünüməşğulluq proqramı çərçivəsində ona 3 baş iribuynuzlu heyvan verilib. Lakin bir ay sonra, 08 avqust 2025-ci ildə heyvanlardan biri qəfil ölüb. Fakt baytarlıq xidməti tərəfindən sənədləşdirilərək aktla rəsmiləşdirilib.

Amma vətəndaşın ölmüş heyvanın əvəzi ilə təmin olunması barədə müraciəti rədd edilib. Rədd səbəbi isə “yarılmış vəziyyətdə şəkil təqdim olunmaması” kimi qanuni əsası olmayan və absurd bir tələblə əsaslandırılıb.

Saxtakarlıq iddiaları bununla da bitmir. Vətəndaşın sözlərinə görə:

- Ona təqdim olunan heyvanların faktiki yaşı 1-1,5 olsa da, sənədlərdə 3 yaş göstərilib;
- Müqaviləyə əsasən verilməli olan 800 kq yem bu günədək verilməyib;
- Heyvanlar isə zəif, xəstə və yararsız vəziyyətdə olub.

Məhbus Süleymanov haqlı olaraq sual edir: Bu necə dövlət dəstəyi proqramıdır ki, vətəndaş dələduzluğa tuş gəlir, haqsız cavablarla geri qaytarılır və susdurulmağa çalışılır?

O bildirir ki, bu cür məsuliyyətsizlik vətəndaşları dövlət proqramlarından uzaqlaşdırır, inamı sarsıdır.

Bakunews.az olaraq məsələni aidiyyəti qurumların – xüsusilə Əmək və Əhalinin Sosial Müdafiəsi Nazirliyi, Dövlət Məşğulluq Agentliyi və Kənd Təsərrüfatı Nazirliyi qarşısında qaldırırıq:

- Verilən heyvanların keyfiyyəti və yaşı hansı əsasla qiymətləndirilib?
- Rəsmi aktla sənədləşdirilmiş ölüm faktı niyə əsas götürülmür?
- Müqavilədə göstərilən yem niyə verilməyib?
- Dövlət proqramlarında bu cür sui-istifadələrə kimlər nəzarət edir?

Sosial proqramlara güvən dövlətə güvəndir. Əgər vətəndaş aldadılırsa, bu proqramın məqsədi nədir?

Bakunews.az məsələni nəzarətdə saxlayır.

Ucar rayonu Lək kənd sakini Süleymanov Məhbus Ağamirzə oğlunun müraciəti Dövlət Məşğulluq Agentliyi tərəfindən araşdırılıb.

Belə ki, vətəndaş 09.07.2025-ci il tarixində “Maldarlıq təsərrüfatı” zərfi üzrə əmlaklarla təmin olunub. 08.08.2025-ci il tarixində isə Mərkəzi Aran Regional Məşğulluq Filialının Xidmət şöbəsinə müraciət edərək heyvanlardan birinin tələf olması barədə məlumat verib.

Araşdırma zamanı vətəndaşın təqdim etdiyi sənədlərin natamam olduğu müəyyən edilib. Belə ki, təqdim edilən sənədlərdə yarma protokolu və heyvanın yarılmış vəziyyətdə çəkilmiş şəkli mövcud olmayıb. Məsələ ilə bağlı Məhbus Süleymanova məlumat verilib.

Qeyd edirik ki, tərəflər arasında bağlanmış müqaviləyə əsasən, özünüməşğulluğa cəlb olunmuş şəxs təhvil aldığı əmlakda hər hansı qüsur aşkar etdiyi halda, bu barədə məlumatı və qüsurları təsdiqləyən sənədləri (aktlar, mütəxəssis rəyi, fotoşəkillər və s.) əmlakı təhvil aldığı tarixdən etibarən ən geci 30 gün müddətində Filiala təqdim etməlidir.

Vətəndaş göstərilən müddət ərzində tələb olunan sənədləri tam şəkildə təqdim etdiyi halda, tələf olmuş heyvanın dəyişdirilməsi ilə bağlı məsələyə qanunvericiliyə uyğun qaydada baxılacaq.

Əlavə olaraq bildiririk ki, Ucar rayonu üzrə sentyabr ayı ərzində qarışıq yemlərin paylanması nəzərdə tutulur.