Məktəbəqədər təhsil sahəsində 18 illik pedaqoji təcrübəsi ilə tanınan Kəmalə Sultanova hazırda Xaçmaz şəhər 1 nömrəli körpələr evi–uşaq bağçasının müdiridir. Onun fəaliyyəti təkcə inzibati idarəçiliklə yox, uşaqlara göstərilən fərdi qayğı, sağlam psixoloji mühitin yaradılması və kollektivlə düzgün iş modeli ilə seçilir.

Kəmalə Sultanova 21 dekabr 1983-cü ildə anadan olub. 2001–2005-ci illərdə Azərbaycan Müəllimlər İnstitutunun Quba filialında “Məktəbəqədər təhsilin pedaqogikası və metodikası” fakültəsində ali təhsil alıb.

Əmək fəaliyyətinə Quba rayonunun Zərdabi qəsəbəsində yerləşən 15 nömrəli körpələr evi–uşaq bağçasında başlayan Sultanova daha sonra Xaçmaz şəhər 2 nömrəli körpələr evi–uşaq bağçasında tərbiyəçi müəllimə kimi çalışıb. Uzun illər ərzində uşaqlarla birbaşa ünsiyyətdə olması ona hər bir uşağın psixoloji və inkişaf xüsusiyyətlərini dərindən anlamaq imkanı verib.

2022–2024-cü illərdə Xaçmaz Rayon Təhsil Sektorunun Psixoloji-Tibbi-Pedaqoji Komissiyasında pedaqoq üzv kimi fəaliyyəti isə onun peşəkar təcrübəsini daha da zənginləşdirib. Bu dövrdə xüsusi qayğıya ehtiyacı olan uşaqlarla bağlı qərarların verilməsində, onların düzgün istiqamətləndirilməsində fəal iştirak edib.

2023-cü ilin avqust ayında məktəbəqədər təhsil müəssisələrinə müdir vəzifəsinə qəbul üçün keçirilən imtahanda 47 bal toplayaraq uğur qazanan Kəmalə Sultanova, iki müsahibə mərhələsindən də uğurla keçdikdən sonra 2024-cü ilin aprel ayında Xaçmaz şəhər 1 nömrəli körpələr evi–uşaq bağçasına müdir təyin olunub.

Müdir olduğu qısa müddət ərzində bağçada bir sıra müsbət dəyişikliklər həyata keçirilib. Təlim-tərbiyə prosesində nizam-intizam gücləndirilib, pedaqoji kollektivlə qarşılıqlı hörmətə əsaslanan iş mühiti formalaşdırılıb. Kəmalə Sultanova hər bir uşağa ayrı-ayrılıqda yanaşma prinsipini əsas götürərək, onların sağlamlığına, təhlükəsizliyinə və psixoloji rahatlığına xüsusi diqqət yetirir.

Valideynlərlə ünsiyyətin açıq və şəffaf qurulması, uşaqların qidalanması, gündəlik rejimi və inkişaf göstəriciləri ilə bağlı mütəmadi məlumatlandırma aparılması da rəhbərliyin əsas prioritetlərindəndir. Bağçada uşaqlar üçün daha səliqəli, təhlükəsiz və inkişafetdirici mühitin yaradılması istiqamətində ardıcıl işlər görülür.

Kollektivin fikrincə, Kəmalə Sultanova təkcə müdir kimi yox, eyni zamanda pedaqoq kimi uşaqların problemlərinə həssas yanaşan, valideynlərin narahatlıqlarını dinləyən və real həll yolları axtaran rəhbərdir.

Redaksiyadan qeyd: "Əvvəllər Kəmalə Sultanovanın fəaliyyəti ilə bağlı redaksiyamıza tamamilə həqiqətə uyğun olmayan məlumatlar daxil olmuşdu. Lakin apardığımız araşdırmalar göstərdi ki, səsləndirilən iddialar nəinki həqiqəti əks etdirmir, hətta həqiqətin yanından belə keçmir. Faktlar və real fəaliyyət Kəmalə Sultanovanın peşəkar, məsuliyyətli və uşaqların maraqlarını ön planda tutan rəhbər olduğunu təsdiqləyir."

Sakit Muradov