Avstriyanın Zalsburq şəhərində Azərbaycan əsilli rəssam Ayna Hüseynovanın “Hisslərin rəngləri” adlı fərdi rəsm sərgisi açılıb.

“Motsartplats” şəhər qalereyasında baş tutan sərgidə rəssamın yağlı boya ilə çəkilmiş 40-a yaxın əsəri nümayiş etdirilib. Onların arasında “Azərbaycan
rəqqasları”, “Səadət”, “Ayna” və başqa sənət əsərləri olub. Sərginin açılış mərasimində iştirak edən Azərbaycan icmasının üzvləri bu mədəni hadisə münasibətlə soydaşımızı təbrik edblər. 13 sentyabr tarixində açılan sərgi oktyabrın 31-dək davam edəcək. Yerli mediaya müsahibəsində rəssam bildirib ki, yaradıcılığının əsas məqsədi şəxsi hissləri kölgə və işığın oyunu ilə birləşdirib, jestlər, mimikalar və rənglər vasitəsilə kətan üzərində ifadə etməkdir.
Qeyd edək ki, Ayna Hüseynova 28 dekabr 1985-ci ildə Bakıda anadan olub. Əzim Əzimzadə adına Azərbaycan Dövlət Rəssamlıq Məktəbinin məzunudur. 2002-ci ildən Zalsburq şəhərində yaşayır. 2011-ci ildə Zalsburq Media-Dizayn Akademiyasını bitirib. Media mütəxəssisi kimi çalışsa da, evindəki emalatxanasında rəsm əsərləri yaratmaqda davam edir. İnsanlarla bağlı mövzularda, xüsusilə də portret rəngkarlığında çalışmağa üstünlük verir. Qadın rəsmlərini öz güclü tərəflərindən biri adlandıran rəssam, əsasən, yağlı boyalarla işləyir, amma eskizlər üçün karandaşdan da istifadə edir.