XI Bakı Beynəlxalq Kitab Sərgisi çərçivəsində AMEA-nın bir sıra elmi müəssisələri, o cümlədən Mərkəzi Elmi Kitabxana (MEK) və Mərakeş Krallığının Milli Kitabxanası ilə əməkdaşlıq memorandumunun imzalanma mərasimi keçirilib.

Tədbirdə AMEA-nın prezidenti akademik İsa Həbibbəyli, Mərakeş Krallığının Azərbaycan Respublikasındakı fövqəladə və səlahiyyətli səfiri Məhəmməd Adil Embarş, Türkiyənin Millət Kitabxanasının rəhbəri Ayhan Tuğlu, Mərakeş Krallığının Milli Kitabxanasının direktoru Samirə Əl Malizi, AMEA-nın Məhəmməd Füzuli adına Əlyazmalar İnstitutunun direktoru akademik Teymur Kərimli, AMEA-nın Mərkəzi Elmi Kitabxanasının direktoru texnika elmləri doktoru Hüseyn Hüseynov, AMEA-nın Rəyasət Heyəti aparatının Xarici əlaqələr və beynəlxalq elmi təşkilatlarla iş şöbəsinin müdiri biologiya üzrə fəlsəfə doktoru, dosent Esmira Əlirzayeva, Azərbaycan Milli Kitabxanasının direktoru professor Kərim Tahirov və aidiyyəti şəxslər iştirak edib, çıxışları dinlənilib.
Daha sonra əməkdaşlıq memorandumları imzalanıb.

Mərkəzi Elmi Kitabxana ilə Mərakeş Krallığının Milli Kitabxanası arasında ikitərəfli əməkdaşlıq memorandumu hər iki qurumun direktorları – texnika elmləri doktoru Hüseyn Hüseynov və Samirə Əl Malizi tərəfindən imzalanıb.

Sənəd arxivləri və kitab fondlarını zənginləşdirmək üçün kitab mübadiləsini, virtual və fiziki sərgilərin təşkilini, kitabxana mütəxəssislərinin qarşılıqlı təcrübə mübadiləsi, təlim, seminar və konfransların təşkilini, kataloqlaşdırma və biblioqrafik təsvir qaydaları üzrə ümumi yanaşmanın qəbul edilməsini, kitabxana-biblioqrafiya proseslərinin avtomatlaşdırılmasını, elektron kataloq və təcrübə mübadiləsini, elektron kitabxanaların birgə istifadəsini, kitab nəşrini və digər müddəaları əhatə edir.

İctimaiyyətlə əlaqələr şöbəsi
pr.mek.az@gmail.com
(012)539-73-67 (daxili 14-14)