Avqustun 15-də qadın voleybolçular arasında XXXIII Avropa çempionatına start verilib.

"Report" xəbər verir ki, sentyabrın 3-dək davam edəcək turnirin final mərhələsinin oyunları İtaliya, Almaniya, Belçika və Estoniyanın ümumilikdə 8 şəhərində keçirilir. Maraqlı məqam budur ki, qitə birinciliyi ardıcıl 3-cü dəfə 24 komandanın iştirakı ilə 4 ölkədə təşkil olunur. Yığmalar hər birində 6 komanda olmaqla 4 qrupa bölünüblər.

A qrupu: Belçika, Sloveniya, Serbiya, Polşa, Ukrayna, Macarıstan

B qrupu: İtaliya, Rumıniya, Bolqarıstan, Xorvatiya, Bosniya və Herseqovina, İsveçrə

C qrupu: Almaniya, Türkiyə, Azərbaycan, Çexiya, İsveç, Yunanıstan

D qrupu: Estoniya, Finlandiya, Niderland, Fransa, Slovakiya, İspaniya

Bir dövrədən ibarət mübarizənin sonunda qruplarında ilk 4 pillədə qərarlaşacaq millilər 1/8 finala vəsiqə qazancaqlar. Bu mərhələdən etibarən isə uduzanlar ölkələrinə dönmək üçün bilet sifariş verə bilərlər.

Azərbaycan millisinin də yer aldığı C qrupunun oyunları Almaniyanın Düsseldorf şəhərindəki “Castello Düsseldorf” arenasında keçiriləcək. İdman qurğusu 3160 azarkeş tutumuna malikdir. Millinin qrup oyunlarının təqvimi isə belədir:

18 avqust. Azərbaycan - Çexiya

19 avqust. Azərbaycan - Almaniya

20 avqust. Türkiyə - Azərbaycan

22 avqust. Azərbaycan - Yunanıstan

23 avqust. İsveç – Azərbaycan

Azərbaycan millisi Avropa çempionatlarının final mərhələsində 10-cu dəfə mübarizə aparacaq. Amma təəssüf ki, tarixin səhifələrini vərəqləyərkən uğurlu nəticəyə rast gələ bilmirik. Komanda yalnız iki dəfə fəxri kürsüdə yer almağa yaxın olub. İlk belə hal 2005-ci ilə təsadüf edib. Onda Faiq Qarayevin çalışdırdığı yığma yarışı 4-cü pillədə başa vurmuşdu. İntibah dövrünü yaşayan komandanın heyətində Alla Həsənova, Yelena Şabovta, İnessa Qorxmaz kimi təcrübəli liderlər, Valeriya Korotenko, Natalya Məmmədova, Oksana Məmmədyarova, Oksana Parxomenko və Yelena Parxomenko kimi gənclər yer almışdılar. Bir sözlə, Faiq Qarayev təcrübəlilərlə gənclərin sintezindən döyüşkən kollektiv formalaşdırmışdı. Amma yığma Xorvatiyada təşkil olunan turnirdə medalın bir addımlığında daynmışdı. 3-cü yer uğrunda görüşdə Rusiya səddini keçmək mümkün olmamışdı – 0:3.

Milli eyni nəticəni bir də 2017-ci ildə təkrarladı. Həmin vaxt isə yarış Azərbaycanla Gürcüstanın birgə təşkilatçılığı ilə baş tutmuşdu. Amma voleybolçu xanımlar doğma meydan amilindən yararlana bilməmişdilər. Bu dəfə Türkiyə yığmasına məğlubiyyət (1:3) medal hesabını açmağa mane olmuşdu. Avropa çempionatının final mərhələlərindəki ümumi nəticələr belədir:
2005 - 4-cü yer

2007 - 12-ci yer

2009 - 12-ci yer

2011 - 9-cu yer

2013 - 15-ci yer

2015 - 14-cü yer

2017 - 4-cü yer

2019 - 10-cu yer

2021 - 24-cü yer

Siyahıdan göründüyü kimi, milli 2 ildən bir keçirilən Avropa çempionatının final mərhələsində davamlı şəkildə iştirak edir. Sadəcə, indiyə kimi medal həsrətinə son qoymaq mümkün olmayıb. Maraq üçün onu da bildirək ki, baş tutan 50 oyunun 15-də qələbə, 35-də məğlubiyyət qeydə alınıb. Setlərin fərqi də ürəkaçan deyil – 60-115.

Bəs bu dəfə necə, tilsimi qırmaq mümkün olacaq? Təəsüüf ki, bu suala birmənalı şəkildə cavab vermək çox çətindir. Bir sadə məntiqlə ki, yığma son illər qeyri-sabit çıxışla diqqət çəkir. Çətin anlarda meydanda məsuliyyəti üzərinə götürüb, komandanı arxasınca daşıyacaq liderlər demək olar ki, yoxdur. Düzdür, Polina Rəhimovanın uzun fasilədən sonra heyətə qayıtması bu yöndə müsbət siqnal sayıla bilər. Amma karyerasının qürub çağını yaşayan 33 yaşlı voleybolçunun da millinin ağır yükünü təkbaşına daşıyacağı inandırıcı görünmür. Əslində, digər milli üzvlərindən də legioner həyatı yaşayanlar var. Sadəcə, kapitan Ayşən Abduləzimova istisna olmaqla, onlar öz komandalarında “əsas skripka” rolunu oynamırlar. Bu isə millinin lehinə olmayan detaldır.

Təxminlər belədir ki, türkiyəli mütəxəssis Ataman Güneyligilin rəhbərlik etdiyi milli qrup səddini adlayacaq. Komandanın buna gücü və potensialı çatmalıdır. Türkiyə və Almaniya qrupun aşkar favoritləridir və onların ilk iki pillədə yer alacaqları şübhə doğurmur. Çexiya, İsveç və Yunanıstanla isə mübarizə aparmaq, hətta onları üstələmək mümkündür. İstənilən halda, 1/8 finala digər iki vəsiqə uğrunda təmsilçimiz və adı çəkilən 3 komanda mübarizə aparacaq.

Bir qədər də turnirin tarixinə boylanmaqla maraqlı faktlara diqqət yetirək. Qadınlar arasında ilk Avropa çempionatı 1949-cu ildə Praqa şəhərində keçirilib. 7 komandanın qatıldığı yarışın qalibi isə SSRİ yığması olub. Ümumiyyətlə, tarixin yaddaşına köçən ölkənin komandası qatıldığı 17 qitə birinciliyində 13 qızıl, 4 gümüş medal qazanmaqla digər rəqiblər üçün hələ də əlçatmazdır. İndiyədək yarışda 40 milli iştirak edib ki, onların 18-i fəxri kürsüdə yer alıb. 21 ölkənin ev sahibliyi etdiyi turnirdə ümumilikdə 1290 oyun baş tutub. 1949-cu il sentyabrın 10-da keçirilən ilk görüşdə Çexoslovakiya Fransaya 3:0 hesabı ilə qalib gəlib. Qitə birinciliyinin 2021-ci il sentyabrın 4-də Belqrad şəhərində gerçəkləşən sonuncu, yəni final matçında isə İtaliya 3:1 hesabı ilə Serbiyanı üstələyib.