İyunun 7-də Səfərbərlik və Hərbi Xidmətə Çağırış üzrə Dövlət Xidmətinin Bakı şəhər Nizami rayon idarəsində (SHXÇDX) çağırışçıların iştirakı ilə “İnsan hüquqları aylığı” çərçivəsində tədbir keçirilib.

Xidmətin Nizami rayon idarəsinin rəisi polkovnik-leytenant Elxan Feyziyev görüşün məqsədi
barədə məlumat verib.

Məruzə ilə çıxış edən SHXÇDX aparatının idarə rəisi polkovnik-leytenant Füzuli İsmayılov bildirib ki, Azərbaycan Respublikası Konstitusiyasını səciyyələndirən mühüm cəhətlərdən biri insan və vətəndaş hüquqlarının kifayət qədər əhatəli şəkildə təsbit olunması və bu hüquqları tanımaq, müdafiə və təmin etməyin isə dövlətin əsas məqsədi olduğunun elan edilməsidir.Konstitusiyanın 12-ci maddəsinin birinci hissəsinə uyğun olaraq insan və vətəndaş hüquqlarının və azadlıqlarının təmin edilməsi dövlətin ali məqsədidir. Konstitusiyanın qəbulundan sonra ölkədə həyata keçirilən çoxşaxəli islahatlar da məhz insan və vətəndaş hüquq və azadlıqlarının səmərəli təmini məqsədinə yönəlib.

Azərbaycan xalqının ümummilli lideri Heydər Əliyev tərəfindən 1998-ci il 18 iyun tarixində “İnsan hüquqlarının müdafiəsinə dair Dövlət Proqramı”nın təsdiq edilməsi ilə insan hüquqları məsələsi bir daha ümumdövlət səviyyəsinə qaldırılıb. Azərbaycan Respublikasının Prezidenti cənab İlham Əliyevin müvafiq Sərəncamı ilə hər il iyunun 18-nin Azərbaycan Respublikasında İnsan Hüquqları Günü kimi qeyd edilməsi insan hüquqları siyasətinin milli strategiya kimi formalaşmasının sübutu olduğunu ifadə edib.

F.İsmayılov Azərbaycanda insan hüquqları sahəsində, xüsusilə də hərbi qulluqçuların hüquqlarının həyata keçirilməsi istiqamətində görülən işlər və aparılan islahatlar barədə iştirakçılara ətraflı məlumat verib. Çağırışçıların hüquq və vəzifələri barədə qanunvericilik aktlarının müddəalarını diqqətə çatdırıb.

Tədbirin sonunda iştirakçıların sualları cavablandırılıb.

BakuNews.az