Sabunçu rayonu Maştağa qəsəbəsində yerləşən F.Bayramov adına 22 saylı tam orta məktəbdə insident baş verib.

bakunews.az-nun qafqazinfo-ya istinadən əldə etdiyi məlumata görə, əlində benzinlə məktəbə gələn valideyn özünü yandıraraq intihar edəcəyini bildirib. Bundan sonra məktəbdə quraşdırılmış “həyəcan siqnalı” işə salınıb və hadisə yerinə polis əməkdaşları gəlib. İntihara cəhd edən şəxs saxlanılaraq ərazi üzrə polis bölməsinə aparılıb. Burada məlum olub ki, özünü yandıracağını bildirən şəxs övladı həmin məktəbdə təhsil alan 1981-ci il təvəllüdlü T.Hüseynovdur. Onun izahatı alınıb.

Orta məktəbdən bakunews.az-ya qafqazinfo-ya istinadən bildirilib ki, hadisə barədə aidiyyəti qurumlar məlumatlandırılıb: “Həmin şəxsin psixoloji problemləri var və məktəbin hasarından keçməklə qeyri-qanuni şəkildə məktəb ərazisinə daxil olub”.

***
Sabunçu rayonu 22 nömrəli tam orta məktəbdən ötən gün baş vermiş insidentlə bağlı “Qafqazinfo”nun sorğusuna cavab olaraq bildirilib ki, valideyn övladının 10-cu sinfə keçə bilməməsinə görə belə bir addım atıb:

“08.09.2022-ci il tarixində məktəbin 9-cu sinif məzununun valideyni hasardan aşaraq məktəbin ərazisinə daxil olub, əlində olan plastik qabdakı mayenin benzin olduğunu bildirərək özünü yandıracağını deyib. Məktəb rəhbərliyi tərəfindən ərazi üzrə polis bölməsinə məlumat verilib, valideynlə fərdi söhbət aparılıb.

Valideyn bu hərəkətinin səbəbini övladının 10-cu sinfə qəbuluna nail ola bilməməsi ilə izah edib.

Valideynlə söhbətdə tam orta təhsilin davam etdirilməsi ilə bağlı qaydalar izah olunub, bunun üçün valideynin müvafiq qaydada müraciət etməsinin zəruriliyi nəzərə çatdırılıb.

Qeyd edək ki, müvafiq qaydalara uyğun müraciət təmin edildikdən sonra məsələ həllini tapıb, həmin şəxsin övladının məktəbin X sinfinə qəbulu təmin edilib”.

bakunews.az