Azərbaycan mediası ağır itki ilə üzləşdi. Tanınmış jurnalist, “Xural” Media Qrupunun rəhbəri Əvəz Zeynallı 28 sentyabr 2026-cı ildə, 56 yaşında vəfat edib. Uzun müddət ağır xəstəliklə mübarizə aparan jurnalistin ölüm xəbəri onu tanıyan, illərlə fəaliyyətini izləyən və eyni media mühitini bölüşən çoxsaylı insanlarda dərin kədər yaradıb.

Bəzən bir jurnalistin həyatdan gedişi sadəcə bir insanın ölümü olmur. Bir səs susur, bir üslub dayanır, illərlə formalaşmış bir media yaddaşı tarixə çevrilir. Əvəz Zeynallının vəfatı da Azərbaycan jurnalistikası üçün məhz belə itkilərdəndir.

Onu sevən də vardı, sərt şəkildə mübahisə edən də, fikirləri ilə razılaşmayan da. Amma Əvəz Zeynallının jurnalistikada özünəməxsus dəst-xətti olduğunu inkar etmək çətindir. O, kameranın qarşısında, qəzet səhifəsində, müsahibə masasında da mövqeyni gizlətməyən jurnalistlərdən idi. Danışığında emosiya, suallarında israr, peşəyə münasibətində isə özünəməxsus inad vardı.

Əvəz Tapdıq oğlu Zeynallı 1 yanvar 1970-ci ildə Göyçə mahalının Ağbulaq kəndində dünyaya gəlmişdi. 1988-ci ildə Azərbaycana köçmüş, daha sonra Türkiyədə Ankara Universitetinin Hüquq fakültəsində təhsil almışdı. Azərbaycana qayıtdıqdan sonra müxtəlif mətbuat orqanlarında çalışmış, 2002-ci ildə “Xural” qəzetini yaratmış, sonrakı illərdə fəaliyyətini “Xural” və “Xural TV” platformaları üzərindən davam etdirmişdi.

Onun həyat yolu peşəsində çətinliklərin öhdəsindən gəlməsi bir tarixdi. Məhkəmələr, həbslər, mühakimələr, yenidən efir, yenidən mübarizə... Bütün bunlar Əvəz Zeynallının ömür yolunun müxtəlif mərhələləri idi. Son illərdə isə onun ən ağır mübarizəsi xəstəliklə oldu. Bir ildən artıq onkoloji xəstəlikdən müalicə alan jurnalist son günlərinə qədər ictimaiyyətlə əlaqəsini tam kəsməmişdi.

Və bəlkə də taleyin ən kövrək məqamlarından biri onun ölümündən cəmi bir gün əvvəl sosial şəbəkədə yazdığı son sözlər oldu. Ona baş çəkən, dəstək olan insanlara təşəkkür edən Əvəz Zeynallı mesajını belə tamamlamışdı:

“Sizə görə varam və Səni Sevirəm, Azərbaycan!”

Bu sözlər indi tamam başqa cür səslənir.

İnsan gedəndən sonra onun haqqında ən çox vəzifələr, titullar deyil, xatirələr danışır. Bir telefon zəngi, redaksiyada edilmiş söhbət, efirdə deyilmiş bir cümlə, dostlarla keçirilmiş saatlar, jurnalist həmkarlarına verilmiş dəstək, bəzən sərt mübahisədən sonra gələn səmimi təbəssüm...

Əvəz Zeynallı da onu yaxından tanıyanların yaddaşında yalnız jurnalist kimi deyil, öz xarakteri, emosiyası, zarafatı, sərtliyi və səmimiyyəti ilə qalacaq.

Jurnalistika qəribə peşədir. Hər gün başqalarının taleyini yazırsan, bir gün isə həmkarların sənin haqqında son xəbəri yazırlar. Bu gün Azərbaycan mediasında çoxlarının qələmindən çıxan ən ağır cümlə eynidir:

Əvəz Zeynallı vəfat etdi...

Bu cümlənin arxasında isə 56 illik bir ömür, uzun jurnalist yolu, saysız-hesabsız efirlər, müsahibələr, yazılar, mübahisələr və saysız xatirələr dayanır.

29 sentyabrda onu sevənlər, doğmaları, dostları və həmkarları Əvəz Zeynallını son mənzilə yola salacaqlar. Mövcud məlumata görə, vida mərasimindən sonra jurnalist Kürdəxanı qəbiristanlığında torpağa tapşırılacaq.

Amma jurnalistin fiziki yoxluğu onun illərlə yaratdığı media yaddaşını bir anda yox etmir. Efir arxivlərində səsi, yazılarda fikirləri, onu tanıyan insanların yaddaşında isə xatirələri yaşayacaq.

Bu dəfə mikrofonun qarşısında Əvəz Zeynallı olmayacaq.
Bu dəfə sualları o verməyəcək.
Bu dəfə onun haqqında danışılacaq...

Allah rəhmət eləsin.
Ruhu şad olsun.
Ailəsinə, doğmalarına, dostlarına və bütün media cameəsinə dərin hüznlə başsağlığı veririk.

Hörmətlə Mirkənan Seyidov, Bakunews.az kolletivi.