Azərbaycanın Qarabağ bölgəsindəki Ermənistan silahlı qüvvələri və separatçı rejimin qanunsuz hərbi dəstələri tərəfindən Ordumuzun mövqelərinin davamlı olaraq atəşə tutması ordumuzun anti-terror əməliyyatı keçirməsini zəruri edirdi və sentyabrın 19-da bu əməliyyat başlandı. Antiterror əməliyyatı Azərbaycanın konstitusiya quruluşunun bərpası, qondarma rejimin süqutu və separatçıların tam məğlubiyyəti ilə nəticələndi. 44 günlük Vətən müharibəsindən sonra ölkəmizin ərazi bütövlüyünün təmin olunması ilə nəticələnmiş Azərbaycanın bu qələbəsi əldə etdiyimiz ən böyük nailiyyətdir. Azərbaycanın qüdrətli ordusu Ali baş komandan İlham Əliyevin rəhbərliyi altında bu vəzifənin ləyaqətlə yerinə yetirərək, bir daha bütün dünyaya öz gücünü,yenilməzliyini nümayiş etdirdi. 24 saat davam edən antiterror tədbirlərinin gedişində artıq məğlub olduqlarını dərk edən separatçı rejimin nümayəndələri Azərbaycan tərəfinə təslim olduqlarını bildirərək atəşi dayandırmağı xahiş etmişlər.
Müzəffər Ali Baş Komandan cənab İlham Əliyev 2023-cü il 20 sentyabr tarixində Azərbaycan xalqına tarixi müraciətində antiterror tədbirləri, onun zəruriliyi, səbəbləri və nəticələri barədə fikirlərini açıqlamış, bu xüsusda baş verən hadisələri müxtəlif aspektlərdən təhlil edərək yeni şəraitdə qarşıda duran taleyüklü məsələləri diqqətə çatdırmışdır.Azərbaycan çoxmillətli, çoxkonfessiyalı dövlət olduğunu vurğulayan cənab İlham Əliyev söylədi ki, indi artıq bölgədə yeni şərait formalaşır və bu müstəvidə bütün ölkə vətəndaşları əmin-amanlıq şəraitində normal və sivil qaydalar əsasında yaşamaq üçün tarixi imkan əldə etmişlər: “Bu gün Qarabağda yaşayan sadə insanlar üçün yeni tarixi bir şans yaradılıb. O şansı əldən verməsinlər. Biz buna hazırıq və Azərbaycan xalqı bilir, əminəm, erməni xalqı da bilir ki, mənim sözüm sözdür. Biz bunu təklif edirik və ümid edirəm ki, bizim təklifimiz qəbul olunacaq. Çünki bu, məntiqə, tarixi ədalətə, beynəlxalq hüquqa, gələcək inkişafa əsaslanan və gələcək inkişafa hesablanan təklifdir. Bunu mən demişəm və bir daha demək istəyirəm, Qarabağın erməni əhalisi bizim vətəndaşlarımızdır. Mən əminəm ki, Qarabağda yaşayan erməni əhalisi tezliklə yaxşılığa doğru dönüşü görəcək. Çünki bizim niyyətimiz sülh, qarşılıqlı anlaşma, qarşılıqlı hörmət əsasında birgə həyat qurmaqdır. Bizim erməni xalqı ilə heç bir problemimiz yoxdur, ədavətimiz də yoxdur Bütün haqsızlıqlara baxmayaraq, bütün kriminal Ermənistan rejimi tərəfindən törədilmiş cinayətlərə baxmayaraq, biz erməni xalqını bu cinayətlərdə heç vaxt günahlandırmamışıq”.
Bu gün Qarabağda yaşayan sadə insanlara dövlətimizin başçısının təklifi onlar üçün yeni tarixi bir şans yaradır. Hesab edirəm ki, Qarabağın erməni əsilli insanları bu şansı əldən verməməli, möhtərəm prezidentimizin məntiqə, tarixi ədalətə, beynəlxalq hüquqa, gələcək inkişafa əsaslanan və gələcək inkişafa hesablanan təklifini yüksək qiymətləndirməlidirlər.
Uğurla başa çatmış antiterror əməliyyatları nəticəsində erməni seperatçılarının tərksilah olunması Azərbaycanla Ermənistan arasında gedən sülh danışıqları prosesinə müsbət təsir göstərəcəyinə, tezliklə regionda qalıcı sülhün təmin olacağına ümid yaradır. Ümid edirik ki, nəhayət, sülh danışıqları üçün olan, Ermənistan tərəfindən qoyulan maneə aradan qalxacaq. Bu, Cənubi Qafqazda yeni reallıq, uzunmüddətli sülh yaradacaq.

Fidan Hüseynova,
YAP Quba rayon təşkilatının sədri