Bir zamanlar Gəncə Dövlət Regional Kollecində yüzlərlə müəllimin etirazları fonunda direktor Xoşqədəm Xudiyevanın müdafiəsinə qalxması ilə bağlı adı hallanan Günay Şahin qızı Məmmədova indi özü haqsızlığa məruz qaldığını iddia edir. Sosial şəbəkələrdəki canlı yayımları, sərt çıxışları və məktəb rəhbərliyi ilə qalmaqalı nəticəsində əmək müqaviləsinə xitam verilən musiqi müəlliminin bugünkü vəziyyəti keçmiş hadisələri yenidən yada salır.

BakuNews.az xəbər verir ki, Gəncədə fortepiano müəllimi kimi tanınan, sonradan Göygöl rayonunun Bənövşəli kənd tam orta məktəbində musiqi müəllimi işləyən Günay Məmmədovanın sosial şəbəkələrdəki fəaliyyəti uzun müddətdir müzakirələrə səbəb olur.

Özünü müxtəlif məsələlərdə haqq-ədalət müdafiəçisi kimi təqdim edən Günay Məmmədovanın bəzi dövlət məmurlarına qarşı sərt, zaman-zaman təhqiramiz xarakter daşıdığı iddia edilən çıxışları da diqqətdən yayınmayıb.

Lakin bu gün söhbət təkcə onun sosial şəbəkələrdəki çıxışlarından getmir. Söhbət haqq-ədalət anlayışına münasibətdə ortaya çıxan ciddi ziddiyyətdən gedir.

Görəsən, başqalarının haqqı tapdalandığı iddia ediləndə susmayan deyil, əksinə, şikayət olunan rəhbər şəxsin müdafiəsində dayanan insan öz hüquqlarına toxunulduqda niyə birdən-birə haqq carçısına çevrilir?

400 müəllim etiraz edəndə Günay Məmmədova kimin tərəfində idi?

Xatırladaq ki, BakuNews.az bir müddət əvvəl Gəncə Dövlət Regional Kollecində təxminən 400 müəllimin əmək hüquqlarının pozulması ilə bağlı daxil olan çoxsaylı şikayətləri ictimailəşdirmişdi.

Müəllimlərin əmək müqavilələrinin dəyişdirilməsi, dərs saatlarının və əməkhaqlarının azaldılması, eləcə də kollecin sabiq direktoru Xoşqədəm Xudiyevanın fəaliyyəti ilə bağlı ciddi iddialar səsləndirilirdi.

Həmin vaxt müəllimlərin etirazlarının araşdırılmasını tələb edən redaksiyamızın diqqətini başqa bir məqam da çəkmişdi.

Redaksiyamıza daxil olan məlumatlara əsasən, Günay Məmmədova yüzlərlə müəllimin etiraz etdiyi dövrdə kollecin direktoru Xoşqədəm Xudiyevanın müdafiəsində fəal mövqe nümayiş etdirirdi.

Məmmədovanın fəaliyyəti ilə əlaqələndirilən “Xalqın haqq səsi” adlı TikTok səhifəsində kollecin müəllimləri ilə bağlı videogörüntülərin yayılması da ciddi suallar doğurmuşdu.

İddialara görə, həmin görüntülər Xoşqədəm Xudiyeva vasitəsilə əldə edilərək ictimailəşdirilmişdi. Bununla bağlı məlumatlar hüquq-mühafizə orqanları tərəfindən araşdırılmalı, görüntülərin mənbəyi və yayılmasının qanuniliyi müəyyən edilməlidir.

Əgər sözügedən materiallar həqiqətən istintaq və ya xidməti araşdırma sənədləri olubsa, onların hansı əsasla sosial şəbəkələrə çıxarılması ayrıca hüquqi qiymətləndirmə tələb edir.

Amma burada ən mühüm məsələ başqadır: 400 müəllimin etiraz etdiyi bir vaxtda Xoşqədəm Xudiyevanın müdafiəsində dayandığı bildirilən Günay Məmmədova bu gün özünü haqsızlığa uğrayan müəllim kimi təqdim edir.

Dünən başqalarının fəryadı, bu gün Günay Məmmədovanın öz fəryadı!

Həyatın qəribə təsadüfləri var.

Dünən yüzlərlə müəllim əmək hüquqlarının pozulduğunu deyərək etiraz edirdi. Bu gün isə həmin etirazlar zamanı direktorun mövqeyini müdafiə etdiyi bildirilən Günay Məmmədova məktəb rəhbərliyini ittiham edir, özünə qarşı haqsızlıq edildiyini bildirir.

Dünən kollec rəhbərliyindən şikayət edən müəllimlərin səsinə münasibətdə fərqli mövqedə dayanan şəxsin bu gün öz şikayətinə hamıdan dəstək gözləməsi düşündürücüdür.

- Bəs 400 müəllimin haqqı nə oldu, Günay xanım?
- Onların etirazları zamanı müdafiə etdiyiniz rəhbərlə bağlı iddiaları niyə eyni həssaslıqla araşdırmağa çağırmırdınız?

Bu sualların cavabı ictimaiyyət üçün maraqlıdır.

Unutmayaq ki, müəllimin haqqını müdafiə etmək yalnız özünün işdən çıxarıldığı gün xatırlanacaq prinsip deyil.

Haqq hamı üçün haqdır. Ədalət yalnız insanın öz maraqlarına toxunanda tələb edilən anlayış ola bilməz!

Əvvəl Xoşqədəm Xudiyeva işdən çıxarıldı, indi Günay Məmmədova!

Gəncə Dövlət Regional Kollecinin direktoru Xoşqədəm Xudiyeva 20 avqust 2026-cı ildə elm və təhsil nazirinin əmri ilə vəzifəsindən azad edildi.

Aradan cəmi iki aydan bir qədər artıq vaxt keçdikdən sonra, 26 oktyabrda Günay Məmmədovanın da əmək müqaviləsinə xitam verildiyi açıqlandı.

Gəncə–Daşkəsən Regional Təhsil İdarəsinin açıqlamasında onun məktəbdə canlı yayımlar açaraq tədris prosesinə müdaxilə etdiyi, müəllimlik peşəsinin etik prinsiplərinə uyğun olmayan davranışlar nümayiş etdirdiyi bildirildi.

Günay Məmmədova isə məktəb rəhbərliyinin ona qarşı haqsız davrandığını iddia edir.

İndi ortaya olduqca düşündürücü mənzərə çıxır: Bir zamanlar 400 müəllimin narazılığı fonunda müdafiə etdiyi direktor vəzifəsini itirib. Bu gün isə Günay Məmmədovanın özü əmək hüquqlarının pozulduğunu bildirərək etiraz edir.

Bu iki işdənçıxarılma qərarının hüquqi səbəbləri fərqli ola bilər. Lakin hadisələrin ardıcıllığı mənəvi baxımdan düşündürməyə bilməz.

Xalq arasında təsadüfi deyilməyib: Haqq yerdə qalmaz!

Bəzən insan başqalarının yaşadığı çətinliyin nə demək olduğunu yalnız özü oxşar vəziyyətlə üzləşəndə daha dərindən anlayır.

BakuNews.az-ın mövqeyincə, bu hadisələrin yaratdığı mənəvi mənzərə ilahi ədalət anlayışını yada salır: Dünən başqalarının haqq mübarizəsinə qarşı mövqe tutduğu iddia edilən şəxs bu gün öz haqqının tapdalandığını deyərək fəryad edir.

Müəllim adı heç kimə qanundan üstün olmaq hüququ vermir!

Azərbaycan Respublikası Əmək Məcəlləsinin 70-ci maddəsinin “ç” bəndi əmək funksiyasının yerinə yetirilməməsi və əmək vəzifələrinin kobud pozulması ilə əlaqədar müəyyən hallarda əmək müqaviləsinə xitam verilməsini nəzərdə tutur.

“Təhsil haqqında” Qanunun 33.3.5-ci maddəsi isə müəllimdən pedaqoji etika və əxlaq normalarına riayət etməyi, müəllim nüfuzunu yüksək tutmağı tələb edir.

Bununla belə, hər hansı müəllimin işdən azad edilməsinin qanuniliyi yalnız konkret sübutlar, əmək müqaviləsinə xitam əmri və qanunla müəyyən edilmiş prosedurlar əsasında qiymətləndirilə bilər.

Məktəb rəhbərliyinin qərarından şikayət etmək hər bir müəllimin hüququdur. Ancaq şikayət adı altında tədris prosesini pozmaq, şəxsi qarşıdurmanı məktəb mühitinə daşımaq və başqalarının hüquqlarına müdaxilə etmək yolverilməzdir.

Əgər Günay Məmmədova öz hüquqlarının pozulduğunu düşünürsə, bunu hüquqi yollarla mübahisələndirmək imkanına malikdir. Lakin onun öz hüquqlarını tələb etməsi keçmişdə 400 müəllimin etirazları zamanı nümayiş etdirdiyi mövqe barədə yaranmış sualları aradan qaldırmır.

Ən böyük hakim vicdandır!

Bu gün Günay Məmmədovanın sosial şəbəkələrdə səsləndirdiyi haqsızlıq iddiaları bir mühüm həqiqəti yenidən xatırladır.

İnsan başqasının haqqına münasibətdə də öz haqqına tələb etdiyi qədər həssas olmalıdır.

Bir zamanlar Gəncə Dövlət Regional Kollecinin yüzlərlə müəllimi hüquqlarının pozulduğunu deyərək səsini ucaltmışdı. Bu gün isə həmin hadisələr fonunda Xoşqədəm Xudiyevanı müdafiə etdiyi bildirilən Günay Məmmədova özünün haqsızlığa uğradığını bəyan edir.

Dünən başqalarının fəryadını eşitmək istəməyən insan bu gün öz fəryadının hamı tərəfindən eşidilməsini gözləyə bilməzmi? Əlbəttə, gözləyə bilər. Amma o zaman başqalarının da eyni haqqının olduğunu qəbul etməlidir.

İlahi ədalətə inananlar yaxşı bilirlər: Haqqı tələb etmək qədər başqasının haqqına hörmət etmək də vacibdir.

BakuNews.az olaraq hesab edirik ki, Günay Məmmədovanın işdən çıxarılmasının hüquqi əsasları obyektiv araşdırılmalı, eyni zamanda onun Gəncə Dövlət Regional Kollecindəki hadisələr zamanı tutduğu mövqe ilə bağlı redaksiyamızın qaldırdığı suallar da cavabsız qalmamalıdır.

Çünki ədalət yalnız Günay Məmmədova üçün deyil, etiraz edən 400 müəllimin hər biri üçün eyni dərəcədə əhəmiyyətlidir!

Mirkənan Seyidov
BNTV.az