“Azərbaycanda son illərdə estetik əməliyyatlara maraq əhəmiyyətli dərəcədə artıb. İnsanların xarici görünüşünü dəyişmək, qüsurları aradan qaldırmaq və ya gəncləşmək məqsədilə müraciət etdiyi bu əməliyyatların sayı çoxalsa da, təəssüf ki, paralel olaraq fəsadlarla nəticələnən halların da sayı artır. Bəzi hallarda vətəndaşlar qeyri-peşəkar şəxslərin əlinə düşür, bəzən isə lisenziyasız klinikalarda əməliyyatlara razılıq verirlər. Bu isə həm sağlamlıq, həm də həyat üçün ciddi təhlükələr yaradır.”
Məsələ ilə bağlı Patrulaz.az-a açıqlama verən vəkil Ramil Vəliyev bildirib ki, həkim və ya klinikanın səhlənkarlığı, yaxud qanunsuz fəaliyyəti nəticəsində xəstənin ölümü və ya sağlamlığına ağır zərər vurularsa, bu, Azərbaycan Respublikasının Cinayət Məcəlləsi ilə tənzimlənir. Qanunvericilik belə hallarda cərimə, tibbi fəaliyyətlə məşğul olmaq hüququndan məhrumetmə və ya azadlıqdan məhrumetmə kimi cəza tədbirlərini nəzərdə tutur. Əgər əməliyyat qəsdən və ya tamamilə qeyri-qanuni formada – məsələn, ixtisassız həkim və ya lisenziyasız klinika tərəfindən aparılıbsa, məsuliyyət daha da ağırlaşdırılır.

Estetik əməliyyatlar adi tibbi prosedur deyil və yalnız peşəkar həkimlər tərəfindən aparıla bilər. Qanunvericiliyə görə, estetik və plastik əməliyyatlarla məşğul olmaq üçün həkim ali tibbi təhsil almalı və cərrah ixtisası üzrə diplomu olmalıdır. Həkimin “Plastik, rekonstruktiv və estetik cərrahiyyə” üzrə ixtisaslaşması, müvafiq sertifikata sahib olması, həmçinin Səhiyyə Nazirliyi tərəfindən verilən fəaliyyət sertifikatına malik olması vacibdir.

Eyni zamanda əməliyyatların keçirildiyi klinikalar da müəyyən tələblərə cavab verməlidir. Klinikanın tibbi fəaliyyət üzrə rəsmi lisenziyası, sanitar-epidemioloji icazəsi olmalı, əməliyyatxana yalnız cərrahi fəaliyyət üçün uyğunlaşdırılmalı və müasir tibbi avadanlıqlarla təchiz edilməlidir. Təhlükəsizlik baxımından əməliyyatxana reanimasiya və təcili tibbi yardım avadanlığı ilə təmin olunmalıdır.

Mütəxəssislər bildirirlər ki, hər bir şəxs estetik əməliyyat barədə qərar verərkən diqqətli olmalı, həkim və klinikanın ixtisası və icazələrini yoxlamalıdır. Reklamlara aldanmaq və ucuz qiymətə razılaşmaq gələcəkdə həm maddi, həm də sağlamlıq baxımından daha böyük problemlərə yol aça bilər. Çünki uğursuz əməliyyatların fəsadlarını aradan qaldırmaq daha çətin və baha başa gəlir, bəzi hallarda isə insan həyatını itirə bilər.(Patrulaz.az)