Son illər Bakıda torpaq sahələrinin kəskin azalması bəzi işbazların əl qolunu bağlayıb. Amma məmurlar “ölümə də çarə var” prismasından yanaşaraq, boş ərazilər taparaq qanunsuz tikintilərə rəvac verirlər. Bakıda bu gün ən çox qanunsuz və tikinti normaları nəzərə alınmadan tikintilər Yasamal rayonunda yerləşir desək yanılmarıq. Təkcə Şərifzadə küçəsi boyunca beş mərtəbəli binaların altında mağazaların artırmalarla tikilməsi, binaların aralığında iaşə obyektlərinin inşası bunu deməyə əsas verir.
Azərbaycan Respublikasının Mülki Məcəlləsinə görə, tikinti məqsədləri üçün ayrılmayan torpaq sahəsində və ya buna lazımi icazələr almadan və ya şəhərsalma və tikinti normalarını və qaydalarını ciddi surətdə pozmaqla tikilmiş yaşayış evi, digər tikili, qurğu və ya başqa daşınmaz əmlak özbaşına tikinti sayılır. Qanunsuz formada tikilən obyekt odur ki, ya torpağın sənədi yoxdur, ya tikilməsi üçün vacib qurumdan icazə alınmayıb və yaxud hansısa torpaq sahəsi zəbt olunub, onun üzərində tikinti işləri aparılır. Əlbəttə ki, belə olan halda müvafiq qurumlar tərəfindən həmin qanunsuz tikintilərlə bağlı tədbirlər görülür. Ya söküntüsü, ya da tikintinin dayandırılması həyata keçirilir. Bundan əlavə, inzibati tədbirlər görülür.
Azərbaycan Respublikasının Mülki Məcəlləsi ilə Yasamalda son 10 il ərzində inşa edilən bütün obyektlər qanunsuzdur. Çünki Oyun meydançalarında, avtomobil dayanacaqlarında belə iki, üçmərtəbəli obyektlər inşa edilib. Bu günlərdə təsadüfən qarşımıza Yasamal rayonu Müzəffər Həsənov küçəsi ərazisində həyata keçrilən tikintini gördük.

Apardığımız araşdırma zamanı bəlli oldu ki, sözügedən tikinti işlərinin aparılmasına dair aidiyyəti dövlət qurumlarının heç birindən lazımi icazəverici sənədləri alınmayıb, inşası həyata keçirilən tikiliyə aid müxtəlif işlər görülərkən normativ tələblərə riayət olunmayıb. Dəmir konstruksiyalardan istifadə etməklə tikintinin ərazisi genişləndirilir. Aydın məsələdir ki, respublikamızda aparılan tikintilərə Dövlət Şəhərsalma və Arxitektura Komitəsi, FHN-nin Tikintidə Təhlükəsizliyə Nəzarət Dövlət Agentliyi, Rayon İcra Hakimiyyəti və onun aidiyyatı qurumları və.s nəzarət edir.
Belə olan halda qarşıya müəyyən suallar çıxır. Necə ola bilər ki Yasamal kimi bir rayonda qanunsuz tikinti işləri aparılır, amma yuxarıda adları sadalanan təşkilatların heç birinin xəbəri olmur? Ən əsası isə icra başçısının kabinetindən belə görünən bu obyekti nədənsə görmürlər. Yasamal rayonununda bu gün bir metr yer tapmaq mümkün deyil. Səbəb aydındır. Cəmi iki il öncəyə qədər Şərifzadə küçəsində binaların qarşısı böyük parkı xatırladırdı. Amma bu gün, bu yerlər bir gecənin içində kimlər tərəfindənsə tikinti normatvləri pozulmaqla obyektlər inşa edilir. Yasamal Rayon İcra hakimiyyətinin başçısı Elşad Həsənov cəmi otağından 100-200 metr kənarda aparılan tikintiləri ya görmür, ya da görmək istəmir. (Vətəninfo.az)
Mövzuya qayıdacayıq.