"Tovuz rayon Dondar Quşçu kənd bələdiyyəsinin sədri Tovuz Dövlət Sosial - İqtisadi Kollecində müəllim kimi işə götürülə bilir, kollecdə 15-20 ilin müəllimlərinə isə ərizənizi yazıb, gedin deyilir.
Bələdiyyə sədri hansı təcürbəyə və yaxud elmi biliyə malikdir ki,birdən-birə o, kollecə müəllim kimi işə götürülür, ona dərs saatı verilir, kollecdə digər müəllimlərə bu şərait yaradılmır?

Kollecə bir müddət əvvəl təyin edilən direktor Hicran Əyyubova bələdiyyə sədrini, eləcə də öz yerlilərini kollecə gətirib işlə təmin edirsə, düşünməsin ki, bunu nə səbəbdən etdiyini digər müəllimlər bilmir. Hələ ki, gözləyirik sonluğun nə ilə bitəcəyini."

Bu fikirlər Faktinfo.az saytına verilən məlumatda qeyd olunur.

O da bildirilir ki, Tovuz Dövlət-Sosial İqtisadi Kollecindən 15-20 ilin müəllimlərini bezdirib işdən çıxartmaq hesabına kimlərinsə varlanmasına əsla yol verilməyəcək. Bunu Təhsil Nazirliyinin qarşısına toplaşmaq, mətbuat konfransı keçirtmək hesabına olsa belə, diqqətdə saxlayacağıq.Kollecin direktoru Hicran Əyyubova elə düşünməsin ki, "burada mənəm, Bağdadda kor Xəlifə" zərb məsəli onun üçün qarşıdakı aylarda da keçərli olacaq.

"Məni bura Ülkər Səttərova qoyub" deməklə də iş bitmir,Hicran Əyyubova kollecə direktor təyin edildikdən sonra 3 nəfər Azərbaycan dili və ədəbiyyat müəllimi, 3 nəfər ingilis dili müəllimi, 3 nəfər baytarlıq, 1 nəfər yer quruluşçusu, 2 nəfər poçt rabitəsi müəllim işə götürüb və götürməkdə davam edir. Necə ola bilər ki, işə götürdüyü müəllimlərə dərs saatı tapılır, amma digər müəllimlərə hələ ki,dərs verilmir. Məgər, işə götürülən müəllimlərin hamısının pedaqoji stajı var,yaxud onlar 8, 15, 20 ilin müəllimlərindən daha savadlıdırlar?



Kollecin baş mühasibinin həyat yoldaşının metodist ştatında saxlanılması da boşuna olmayıb. Kollecin dalandarının işdən çıxarılması hansı məqsəddən qaynaqlanıb, bunlar bəllidir. Direktor gələr-gəlməz müəllimlərlə iltimatum dili ilə danışıb, iclaslarda hədə-qorxu gəlirsə, düşünməsin ki, bunun fövqündə nəyin dayandığını müəllimlər bilmir.Keçmiş direktor Rizvan Qəmbərov da eyni abu-havada idi.Ondan Azərbaycan Respublikası Prezident Administrasiyasının Humanitar şöbəsinə,digər aidiyyatı orqanlara edilən şikayətlərdən sonra müəllimlə necə danışmaq lazım olduğunu öyrəndi.

Məlumatda o da vurğulanır ki, 106 saylı Tovuz Seçki Dairəsinin deputatı Nizami Səfərov da Tovuz Dövlət-Sosial İqtisadi Kollecində baş verənlərlə maraqlansa, pis olmaz. Hər halda o, deputat kimi tovuzlu seçiciləri təmsil edir.

Qarşı tərəf Tovuz Dövlət Sosial-İqtisadi Kollecinin direktoru Hicran Əyyubova məsələyə münasibət bildirib.

"İşə qəbul və bir sıra müəllimlərə hələlik dərs saatlarının verilməməsi qanunvericiliyin tələblərinə uyğun olaraq,həyata keçirilir.

Kollecdə daxili işə qəbul komissiyası yaradılıb.İxtisasları yol verən müəllimlər imtahan edilib,imtahandan keçən yeni müəllimlər işə götürülüb.Biz yeni müəllimləri bu qayda üzrə işə götürmüşük.Eləcə də, yeni işə götürülən müəllimlərin tədris edəcəyi fənn üzrə ixtisas uyğunluğu olduğundan, həmin müəllimlərə dərs saatı verilib.Təbii ki, biz ibtidai sinif müəllimlərinə tədris etmələri üçün aidiyyatı olmayan fənlər üzrə dərs saatı verə bilmərik.

O ki, qaldı müəllimləri təhdid etməyimə,onlara hədə-qorxu gəlməyimə və digər fikirlərə yalan məlumatlardır. Mən elə bir insan deyiləm" -məlumatda vurğulanır.

Xüsusi qeyd: Faktinfo.az onu da xatırladır ki,tələbəyə dərs vermə həm də bir vicdan məsələsidir.Praktikada olub ki, davamlı olaraq 5-10 il bir fənni tədris edən müəllim, fənn ixtisas müəlliminin özündən daha yaxşı nəticələrə nail olub.Təbii burda oxşar fənn ixtisasın tədris olunmasından söhbət gedir. Bu nümunə Tovuz Dövlət Sosial-İqtisadi Kollecində bu gün dərs saatı verilməyən müəllimlər üçün də keçərli ola bilərdi.Hər halda birinci olaraq onlar sözügedən kollecdə daxili işə qəbul komissiyası tərəfindən imtahan edilməli idilər.

Çünkü sərt anlaşılmaz məmur mövqeyi, eləcə də "hara şikayət edirsən, et" emosional ifadə tərzinin doğurduğu sonluq,həmişə narazılıqların kütləviləşməsinə səbəb olub.

Faktinfo.az