Diasporla İş üzrə Dövlət Komitəsinin sədri Fuad Muradov Qazaxıstanın Mangistau
vilayətində fəaliyyət göstərən “Dostluq” Etnomədəni Birliyinin sədri Şəmsəddin
Hüseynovu qəbul edib.
Qonağı salamlayan Komitə sədri qardaş ölkədəki icmamızın aktiv fəaliyyətini
müsbət qiymətləndirib. Ölkələrimiz arasında ikitərəfli münasibətlərin inkişafının
diasporun fəaliyyətinə pozitiv təsirindən danışıb. Komitənin Qazaxıstanın müxtəlif
bölgələrində, eləcə də Aktau, Almatı, Türküstan, Şimkənd və Astanada fəaliyyət
göstərən diaspor təşkilatları ilə birgə layihələr həyata keçirdiyi vurğulanıb,
icmamızın fəaliyyətinin daha da genişləndirilməsinə dair tövsiyələr nəzərə
çatdırılıb.
Sonra Şəmsəddin Hüseynova təltif olunduğu Azərbaycan Respublikasının
“Diaspor fəaliyyətində xidmətə görə” medalı təqdim edilib.
Birlik sədri diaspor fəaliyyətinin yüksək qiymətləndirilməsinə görə Azərbaycan
dövlətinə dərin minnətdarlığını ifadə edib. Bildirib ki, soydaşlarımız qətiyyətli və
əzmkar siyasəti ilə Azərbaycanın ərazi bütövlüyünü təmin edən Prezident İlham
Əliyevlə qürur duyurlar. 30 ildən artıq Qazaxıstanda yaşadığını xatırladan birlik
sədri bundan sonra da Azərbaycanla Qazaxıstanın milli maraqlarının müdafiəsi,
ikitərəfli münasibətlərin inkişaf etməsi və diasporumuzun güclənməsi naminə
çalışacaqlarını vurğulayıb.