BakuNews.az-a daxil olan şikayətdə bildirilir ki, Yasamal rayonu, Yeni Yasamal – II massivində yerləşən 308 nömrəli tam orta məktəbin direktoru Təranə Məmmədova uzun illərdir məktəbdə qanunsuzluqlara yol verir.

Vətəndaşların sözlərinə görə, direktor məktəbi “öz mülkü kimi idarə edir” və korrupsiya hallarına yol verdiyi iddia olunur:

“O qədər qanunsuzluqlar edib ki, sayı-hesabı yoxdur. Özünü həmişə təmiz göstərməyə çalışır, xüsusi adamlar vasitəsilə təriflənir. Halbuki məktəbdə şikayətlərin sayı çoxdur və çoxu ört-basdır edilir.”

Şikayətçilərin iddiasına görə, korrupsiya ilə bağlı etiraz edən müəllimlər də daim incidilib:

“Korrupsiya ilə bağlı söz deyən xanımı sıxışdırıb. Fikri odur ki, pensiya yaşına qədər məktəbi talasın.”

Məsələ ilə bağlı yayılan səs yazıları da redaksiyamıza təqdim olunub. Həmin səs yazılarında direktorun qəbul edilməz ifadələr işlətdiyi aydın eşidilir.
Şikayətçilər bildirirlər ki, bu barədə dövlət qurumlarına da yazılı müraciətlər edilib və məsələ geniş ictimaiyyətə çatdırılmalıdır. Onların sözlərinə görə, qanunsuzluqlara hüquqi qiymət verilməsi üçün aidiyyəti orqanlar dərhal tədbir görməlidir.

Qeyd edək ki, 2007-ci ildən fəaliyyət göstərən 308 saylı məktəb 1296 yerlikdir və 6 korpusdan ibarətdir. Məktəb bir sıra nailiyyətlər əldə etsə də, hazırda onun direktoru Təranə Məmmədovanın fəaliyyəti ilə bağlı ciddi narazılıqlar gündəmdədir.

Qarşı tərəfin mövqeyi: Məsələ ilə bağlı direktor Təranə Məmmədovanın, həmçinin Təhsil Nazirliyinin mövqeyini öyrənməyə çalışacağıq.

Onların cavabını dərc etməyə hazırıq.