Ərdoğan: Məkkə sazişi sülhün təmin olunmasını hədəfləyən bütün ölkələr üçün açıqdır
Məkkə sazişi regionda sülhün, rifahın və sabitliyin təmin olunmasını hədəfləyən bütün qardaş ölkələrin iştirakına açıqdır.
Bunu Türkiyən Prezidenti Rəcəb Tayyib Ərdoğan "X" hesabında yazıb.
Onun sözlərinə görə, BMT Nizamnaməsinin 51-ci maddəsində təsbit olunmuş özünümüdafiə hüququnu da təsdiqləyən saziş heç bir ölkəni hədəf almır:
"Türkiyə regional məsuliyyət və təşəbbüs baxışı çərçivəsində münaqişə və böhranların beynəlxalq hüquqa hörmət əsasında, dialoq və diplomatiya yolu ilə həllinə yönəlmiş prinsipial mövqeyini qətiyyətlə davam etdirəcək".
Türkiyə lideri qeyd edib ki, saziş təhlükəsizlik və müdafiə sahəsində əməkdaşlığın daha da inkişaf etdirilməsinə, müdafiə sənayesində birgə layihələrin həyata keçirilməsinə və terrorizmlə mübarizəyə mühüm töhfə verəcək.
Qeyd edək ki, bu gün Səudiyyə Ərəbistanı, Türkiyə və Pakistan birgə müdafiə haqqında Məkkə sazişini imzalayıblar.
Əlaqə whatsapp:+994 70 402 02 85
BakuNews.az
