Ağdam rayon İcra Hakimiyyəti növbəti tenderinə yekun vurub.

Sözügedən qurum Quzanlı qəsəbəsindəki “Daş evlər” adlanan ərazidəki fərdi yaşayı evlərini əsaslı təmir edəcək.

Rəsmi məlumatda qeyd edilir ki, tenderin qalibi “FEB-222 TİXS” MMC olub. Divarların boyanması, evlərin döəmələrinin, tavanlarının və digər bu kimi 37 adda işlərin görülməsinə görə, İcra Hakimiyyəti şirkətə 170 min 3 manat pul ödəyəcək.

Tribunainfo.az məsələ ilə bağlı açıq mənbələr üzərindən bəzi araşdırma aparıb. Məlum olub ki, “FEB-222 TİXS” MMC son bir ildə cəmi 4 tenderin qalibi olub. Maraqlı məqam odur ki, bu tenderlərin hamısı Ağdam İcra Hakimiyyətinin keçirdikləri olub.

Belə ki, ötən ilin oktyabrında Quzanlı qəsəbəsi “Daş evlər” adlanan ərazidə fərdi yaşayış evlərinin əsaslı təmiri işləri reallaşdırılıb. “FEB-222 TİXS” MMC buna görə, 164 min 436 manatlıq satınalma müqaviləsi bağlayıb.

Elə həmin ilin noyabrında MMC Icra Hakimiyyətinə istehsalat nəqliyyat vasitələri alıb. Bu müqavilənin dəyəri isə 51 min 896 manat təşkil edib.

Ağdam rayon Quzanlı qəsəbəsi ərazisində abadlıq və yaşıllaşdırma işlərinin görülməsi isə ötən ilin dekabrında baş tutub. Bu tenderin qalibi olan “FEB-222 TİXS” MMC Ağdam İcra Hakimiyyətindən 191 min 984 manatlıq sifariş alıb.

Qeyd edək ki, “FEB-222 TİXS” MMC Bakı şəhəri, Yasamal rayonu, Şərifzadə küçəsi ev.69, m.22-də qeydiyyatdadır. Şirkətin nizamnamə kapitalı 10 manat təşkil edir. MMC-nin qanuni təmsilçi Bağırov Fərhad Elmdar oğludur. Şirkət dövlət qeydiyyatına 20 aprel 2017-ci ildə alınıb.

“Vergilər” qəzetində dərc olunan məlumata görə, “FEB-222 TİXS” MMC-nin əvvəlki adı “FEB-222” olub. 7 iyun 2018-ci ildə şirkət ləğv edilib. Onun bazasında isə yenisi yaradılıb.

Bu şirkətin yalnız Ağdam İcra Hakimiyyətinin tenderlərini udması maraqlı olduğu qədər, həm də müəmmalıdır.

Xatırladaq ki, Ağdamın icra başçısı Vaqif Həsənovdur. O, 28 avqust 2018-ci ildən rayonu idarə edir.

Yazıda adı keçən tərəflərin də mövqeyini dərc etməyə hazırıq.

Tribunainfo.az