Balakən rayonunda, avtovağzalın qarşısında yerləşən "Dəniz Market" adlı ticarət obyektində vergi qanunvericiliyinə zidd olaraq axşam saatlarında müştərilərdən ödənişlər rəsmi qaydada deyil, kartdan-karta üsulu ilə qəbul edilir.

Bakunews.az xəbər verir ki, Marketin sahibi İbadov Rüstəm Bayram oğlunun göstərişi ilə gün ərzində post-terminaldan istifadə edilsə də, axşam saatlarında nağd ödəniş olmayan alıcılardan ödənişlər sahibkarın həyat yoldaşı – Patima İbadovanın adına olan bank kartına yönləndirilir. Bu üsul rəsmi maliyyə hesabatlarına daxil olmayan dövriyyənin formalaşmasına və beləliklə də vergi öhdəliklərindən yayınmağa şərait yaradır.

Qanunvericiliyə əsasən, ticarət fəaliyyəti ilə məşğul olan şəxslər bütün satış əməliyyatlarını post-terminal və ya nəğd formada rəsmiləşdirməli, ödənişlər isə fiskal çeklərlə sənədləşdirilməlidir. Kartdan-karta ödəniş isə nə alıcıya, nə də dövlətə əməliyyatla bağlı heç bir rəsmi sübut təqdim etmir və bu, vergi nəzarətindən yayınmaq üçün sui-istifadə halı hesab olunur.

Bu cür halların qarşısını almaq üçün aidiyyəti qurumların məsələ ilə bağlı təcili tədbir görməsi, obyektin fəaliyyətinin yoxlanılması və qanunsuzluqlara son qoyulması zəruridir.

Q.Mahalova
Bakunews.az