Nərimanov rayonunda “Zeyd” restoranı hansı məmurla “anlaşdı”?
Nərimanov rayonu, Təbriz küçəsində yerləşən “Zeyd” restoranının piyadalar üçün nəzərə tutulan səkinin böyük hissəsini zəbt etməsi barədə xəbər vermişdik.
Bu ilin əvvəlində adı çəkilən restoranın yerləşdiyi binanın sakinləri Musavat.com-a müraciət edərək şikayətlərini bildirmişdilər.
Sakinlər qeyd edirdilər ki, restoranın səkini zəbt etməsi həm piyadaların hərəkətində çətinlik yaradır, həm də səs-küy bina sakinlərini narahat edir.
Bu müraciət dərc edildikdən bir neçə saat sonra İcra Hakimiyyətindən saytımıza bildirildi ki, sakinlərin şikayətləri əsasında sözügedən ünvanda Ticarət və Xidmət Departamenti və Nərimanov rayon Mənzil-Kommunal Təsərrüfat Birliyi tərəfindən səki zəbtinin qarşısı alınıb.
Həmçinin əraziyə yığılan konstruksiyaların daşındığını, ərazinin təmizləndiyini əks etdirən fotoları da icra hakimiyyəti paylaşmışdı.
Bəs sonra nə dəyişdi?
Sakinlər yenidən müraciət edərək obyektin səkinin əsas hissəsini zəbt edərək fəaliyyətini tam şəkildə bərpa etdiyini bildirirlər.
Bir neçə saatlıq şou kimə lazım idi? Kim kimi aldatdı? İcra Hakimiyyəti ictimaiyyəti aldatdı, yoxsa restoran sahibi İcra Hakimiyyətini?
Əlaqə whatsapp:+994 70 402 02 85
BakuNews.az
