Bodrum Türkiyənin Egey sahillərinin ən "əyləncəli" kurortu adlanır. Təcrübəli səyahətçilər hətta onu hər kvadrat kilometrə restoran, bar və gecə klublarının ən yüksək sıxlığı ilə türk gecə həyatının paytaxtı adlandırırlar. Egey dənizinin nisbi sərinliyi bir çox avropalı turistləri, o cümlədən ingilisləri, fransızları, skandinaviyalıları və almanları cəlb edir. Antalya və Alanyadan sonra Bodrum azərbaycanlı səyahətçilərin sevimli türk kurortlarından biri sayıla bilər. İndi bu bahalı, lakin çox məşhur kurortda qənaətcil bir tətilin imkanlarını müəyyən etməyə çalışacağıq.

Qiymət amili

Yayda Bodrumda istirahət etmək üçün ən sərfəli variant, qəribə də olsa, hazır turpaket almaq olacaq. Avqust-sentyabrın əvvəli tətil mövsümünün ən yüksək vaxtıdır və insanların əksəriyyəti tətillərini məhz bu ay üçün planlaşdırır. Müvafiq olaraq, avqust ayı qiymətlərin həmişə ən bahalı vaxtıdır0 və burada ucuz turlara və biletlərə ümid etmək olmaz.

Bu dövr üçün ən ucuz turpaketlər 700-800 dollar (1190-1360 manat) olan yeddi günlük turlardır. Səyahət agentliklərinin təklif etdiyi paketə təyyarə, üç və ya sadə dördulduzlu oteldə 7 gecə, hər şey daxil yeməklər, transferlər və sığorta aiddir. Beşulduzlu oteldə həftəlik istirahətin qiyməti iki nəfərlik otaqda adambaşına 1000-1100 dollardan başlayır. Bu variantın əsas üstünlüyü ondan ibarətdir ki, turist ucuz bilet, otel, hava limanından və hava limanına transfer variantları axtarıb narahat etməyəcək. Sizə yalnız bir seçim etmək və pul ödəmək qalır - qalanını sizin yerinizə tur şirkəti edəcək.

Əgər özünüz bir tur qurmaq istəyirsinizsə və bu dəqiqə Bodruma bilet götürməyə hazırlaşırsınızsa, o zaman hər iki istiqamətə birbaşa reyslə (AZAL) minimum 900 manat ödəməli olacaqsınız. Gələn ay üçün reyslərə biletlər də baha olacaq.

Ən ucuz transfer

Deyək ki, siz artıq bilet məsələsini həll etmisiniz, təhlükəsiz şəkildə Bodruma uçmusunuz və indi otelə necə çatacağınızı düşünürsünüz, o zaman seçimlər bunlardır: əgər tur paketiniz varsa, gəlişdən sonra, hava limanını tərk etməzdən əvvəl, turoperator sizi qarşılayacaq və seçilmiş otellərə aparacaq. Müstəqil turistin üç yolu var - taksi, avtobus və ya oteldən sifariş edilən transfer. Qəribədir ki, ən bahalı, lakin ən sürətli sonuncu seçimdir - orta hesabla 50 avroya başa gələ bilər. Taksi, ən yaxşı halda, sizi 350 lirəyə (20 avro) Bodrumun mərkəzinə gətirəcək - bu, yarım saatlıq yol üçün minimum qiymətdir. Ən ucuzları təbii ki, hava limanı ilə Bodrumun mərkəzi avtovağzalı (Otogar) arasında 45-50 dəqiqəyə hərəkət edən Havaş bələdiyyə avtobuslarıdır. İyul-avqust ayları üçün biletin qiyməti 60 lirədir (3,3 avro). Üstəlik, bileti həm lirə ilə, həm də bank kartı ilə birbaşa avtobusda ödəyə bilərsiniz.

Ən yaxşı otel hansıdır?

Yuxarıda qeyd edildiyi kimi, Bodruma hazır bir tur paketi almaq ayrıca bilet, otel, transferdən daha ucuz olacaq. Belə ki, əgər ayrıca alınmış aviabiletiniz varsa və hər şey daxil olmaqla Bodrum otelində bir həftəlik tətil bron etmək istəyirsinizsə, o zaman sadə üçulduzlu otel iki nəfərlik, hətta təklər üçün ən azı 450-500 dollara başa gələcək. Buna uyğun olaraq dörd ulduzda 7 gün orta hesabla 200-300 dollar baha başa gələcək, 5 ulduz üçün isə 900-1000 dollardan çox pul ödəməli olacaqsınız.

Bodrumda bir çox prestijli və yüksək keyfiyyətli otellər əsasən onun kənarında yerləşir, məsələn, Bitez, Gəltürkbükü, Turqutreis, Torba və s. Buralarda gecə klubları cəmləşib, avropalılar tərəfindən sevilir. Bodrumun mərkəzində büdcəli turist üçün sərfəli ola biləcək kiçik otellər və pansionatlar var. Bodrumda yerləşmə qiymətləri Antalya, Alanya, Kəmər, Alaçatı, Fethiye, Kuşadası, Marmarisdəkindən daha yüksəkdir. Eyni zamanda, mərkəzdə yayda mövsümdən asılı olaraq 40-50 dollara (səhər yeməyi ilə) ekonom otel və ya pansionat tapmaq mümkündür. Nəzərə alın ki, "yüksək" mövsüm may-sentyabr aylarıdır, digər vaxtlarda otellərdə qiymətlər xeyli aşağıdır.

Əyləncə və attraksionlar

Şərqşünaslar deyirlər ki, Bodrum tarixdən nəfəs alır. Axı, qədim Kariyanın paytaxtı olan Halikarnasın ən zəngin şəhəri bir vaxtlar burada yerləşirdi. İndi, bəzi sağ qalmış tikili fraqmentləri istisna olmaqla, Halikarnas Bodrumun tam mərkəzində yerləşən ən məşhur gecə klubu "Halikarnas"ı xatırladır. Bodrumun ən böyük klubu, qədim amfiteatr kimi stilizə edilib və eyni anda 5 minə qədər insanı qəbul edən klubda hər gün çoxlu ziyarətçi olur.

Səyahət agentlikləri müxtəlif gündəlik turlar təklif edir. Hansı ki, kimsəni laqeyd qoymayacaq. Ən məşhur gündəlik turlardan biri Yaxta Kruizidir. Nahar da daxil olmaqla 15-20 avroya gəmi sahil ətrafındakı bir neçə ada və çimərlikdə 6-7 saat dayanır. Şəffaf, təmiz, lakin sərin suda üzgüçülük və günəş vannası qəbul etməyi sevənlər üçün bu əla seçimdir.

Populyar turlar arasında həmçinin Jeep Safari (33 avro) var ki, bura nahar da daxildir. Gün ərzində siz açıq ciplə qərb sahilinin dağlarını, təpələrini, kəndlərini və çimərliklərini keçəcək, kənd sakinlərinə baş çəkəcək, xalça və yerli zeytun yağı satışı mərkəzlərinə baş çəkəcəksiniz. Bu safarinin ən məşhur xüsusiyyəti adətən ciplə gəzinti zamanı su maşınları ilə "döyüş oyunları oynamaq" imkanıdır. Üstü açıq avtomobillərdə səyahət zamanı qızmar istini nəzərə alsaq, qonşu maşınlara su "səpmək" yaşından asılı olmayaraq bütün tur iştirakçıları üçün çox əyləncəlidir.

Yerli agentliklər sizə palçıq vannaları üçün Dalyan səyahəti, Pamukkale, Efes turları, balıq ovu, dalğıc, at sürmə, kvadrovelosiped sürmə, su parkı, Türk gecəsi və s. Şengen vizası sahibləri isə ən yaxın Yunanıstanın Kos və Rodos adalarını ziyarəti təklif edəcəklər.

Alış-verişə hara getmək olar?

Əsas diqqət çimərlik tətilləri və əyləncələr olduğu üçün Bodrum həmişə alış-veriş imkanları ilə tanınmayıb. Ancaq son bir neçə il ərzində burada türk mağazalar şəbəkəsinin ən çox cəmləşdiyi Midtown və Oasis Mall ticarət mərkəzləri tikilib.

Sahil və bələdiyyə parkının yanında müxtəlif mağazalarla dolu piyada küçəsi - Kale prospekti var. Burada turistlər dizayner zərgərlik məmulatları, əsl dəridən hazırlanmış aksessuarlar və çantalar, geyimlərin nümayiş olunduğu salonlar, eləcə də hər zövqə uyğun kafe və restoranlar tapa bilərlər. Mağazaların əksəriyyəti səhərdən gecə yarısına qədər açıqdır.\\milli.az\

bakunews.az