Geridə qoyduğumuz 2023-cü il ölkəmiz üçün sözün əsl mənasında, tarixi nailiyyətlər, zəfərlərlə və bir sıra əlamətdar hadisələrlə yadda qaldı. Xüsusilə qeyd edilməlidir ki, 2020-ci ildə Vətən müharibəsində qazanılan Zəfər, torpaqlarımızın işğaldan azad edilməsi, 2023-cü ildə birgünlük antiterror əməliyyatı nəticəsində Azərbaycanın öz dövlət suverenliyini tam bərpa etməsi, respublikamızda gedən bütün proseslərə əhəmiyyətli dərəcədə təsir göstərdi, cəmiyyətimizə xoş ovqat bəxş etdi. Ən əsası da odur ki, bu savaşda qazanılan qələbələr işğaldan azad olunan ərazilərimizdə genişmiqyaslı quruculuq işlərinin həyata keçirilməsi ilə davam etdi.
Geridə qoyduğumuz ildə ölkəmiz həm regional, həm də beynəlxalq müstəvidə mühüm uğurlar əldə etmiş, xarici siyasət kursunda - diplomatik cəbhədə, danışıqlar masasında əsaslı üstünlüklər qazanmışdı. 2023-ci il Azərbaycanı bütün dünya ölkələri üçün yaxın, etibarlı tərəfdaş, sözü imzası qədər dürüst və dəyərli olan dövlət kimi xarakterizə etdi

Prezident İlham Əliyev 31 Dekabr - Dünya Azərbaycanlılarının Həmrəyliyi Günü və Yeni il münasibətilə xalqa etdiyi müraciət bir sıra məsələlərlə tarixə keçdi. Xalqa müraciətində dövlət başçısı bildirmişdir ki, ötən il birgünlük antiterror əməliyyatı nəticəsində ölkəmiz öz dövlət suverenliyini tam bərpa etmiş, işğalçı qüvvələrin Azərbaycan ərazisindən çıxarılması təmin edilmiş, düşmən ordusu məhv edilmiş, düşmənin hərbi texnikası məhv edilmiş və ya qənimət kimi götürülmüşdür.

Dövlət başçısı bildirdi ki, Azərbaycan öz dövlət suverenliyini tam bərpa etməli idi və etdi. Üç il ərzində biz bunu sülh yolu ilə həll etmək istəyirdik. Hesab edirdik ki, Ermənistan rəhbərliyi İkinci Qarabağ müharibəsinin nəticələrini düzgün təhlil edərək özü üçün nəticə çıxaracaq. Əfsuslar olsun ki, bu, belə olmadı. Üç il ərzində Ermənistan öz üzərinə götürdüyü öhdəlikləri nəinki yerinə yetirmədi, hətta əksinə, bizə qarşı yeni hərbi təxribatlar hazırladı və onları həyata keçirdi. Qanunsuz olaraq torpağımızda məskunlaşmış 15 minlik Ermənistan ordusu Qarabağdan çıxarılmadı. Əksinə, yeni silahlar, sursatlar, hərbi texnika, minalar Qarabağa gətirildi və ölkəmizə qarşı mina terroru davam etdirildi.
Təbii ki, biz bu vəziyyətlə barışa bilməzdik. Dəfələrlə Ermənistan rəhbərliyinə və onun arxasında dayanmış Qərb ölkələrinə xəbərdarlıq edilmişdir ki, bu vəziyyət davam edə bilməz. Ya separatçı rejim özünü buraxmalıdır, Ermənistan ordusu bizim ərazimizdən çıxarılmalıdır, ya da ki, biz güc tətbiq edərək dövlət suverenliyimizi özümüz bərpa edəcəyik. Əfsuslar olsun ki, bizim sözümüzə diqqət yetirilmədi. Sentyabrın 19-da başlamış və cəmi bir gün, ondan da az davam edən antiterror əməliyyatı Azərbaycan Ordusunun tam Zəfəri ilə nəticələnmişdir. Separatçı rejim çökmüş, bizim qarşımızda diz çökmüş, ağ bayraq qaldırmış, təslim olmuş, torpaqlarımızdan əbədi olaraq çıxarılmış və tarixin zibilxanasına atılmışdır.
Azərbaycan Ordusu bir daha peşəkarlıq, qəhrəmanlıq, əsgər və zabitlərimiz fədakarlıq göstərmişlər. Allah bütün şəhidlərimizə rəhmət eləsin! Onların əziz xatirəsi bizim qəlbimizdə əbədi yaşayacaq. Şəhidlərimizin qanı yerdə qalmadı. Həm Birinci, həm İkinci Qarabağ müharibəsi, həm antiterror əməliyyatı zamanı şəhid olmuş əsgər, zabitlərimizin, mülki şəxslərin, Xocalı qurbanlarının qisası döyüş meydanında alındı.

Qarabağ və Şərqi Zəngəzurun hazırda böyük tikinti meydançasına çevrildiyini bildirən dövlət başçsı artıq 5 minə yaxın keçmiş köçkünün öz doğma torpaqlarına qayıtdığını da qeyd etdi. Prezident İlham Əliyev müraciətində vurğuladı ki, 2024-cü ildə bir neçə yaşayış məntəqəsinə keçmiş köçkünlər, qaçqınlar qayıdacaqlar. Belə ki, il ərzində Kərkicahan, Malıbəyli, Turşsu kəndləri tam bərpa edilib keçmiş köçkünlərin sərəncamına veriləcək. Eyni zamanda, il ərzində Xocalı və Xankəndi sakinləri də öz evlərinə qayıdacaqlar. Bundan başqa, bir neçə yaşayış məntəqəsi də keçmiş köçkünləri qəbul etməyə hazır olacaq.
Dünya Azərbaycanlılarının Həmrəyliyi Günü və Yeni il münasibətilə müraciətində Prezident İlham Əliyev onu da qeyd etdi ki, hazırda bütün dünya azərbaycanlıları haqlı olaraq müstəqil Azərbaycanla fəxr edirlər. Artıq üç ildir ki, dünya azərbaycanlıları bütün Azərbaycan xalqı kimi ruhyüksəkliyi ilə, başını dik tutub, alnıaçıq, üzüağ yaşayırlar.

Fidan Hesynova,
YAP Quba rayon təşkilatının sədri